模範生:張舒雅天橋洗底不再Hea

蘋果日報 2011/06/12 00:00


張舒雅背負最hea港姐冠軍之名三年,死因簡單,性格不合而分手。今年轉戰模壇再來過,成為熊黛林和Angelababy同門師妹,表明會投入做好呢份工,如會為司儀工作對稿到凌晨,連父母都覺得她變了另一個人,其母更撰寫信件讚女兒認真成長了,深受感動。
過去式:2008年香港小姐冠軍;現在進行式:加盟熊黛林及Angelababy所屬的Style做模特兒,張舒雅坦言都是以一份工來對待,分別只在於投入程度:「心態係有唔同,之前覺得選港姐係一份工,抱住學吓、參與,以前可能好唔在乎,家一定唔係、我好着緊。」
母寫信打氣
訪問當日,張舒雅4點有司儀工作,她12時已乖乖在髮廊set頭,帶齊化妝袋和高踭鞋,她表示對稿至深夜3時:「連屋企人都覺得好奇怪,爹哋媽咪仲笑我:『未見過我咁認真』,媽咪仲寫咗封信畀我,讚我認真咗好多,大個女,自己都好感動。」
張舒雅擁有1米8身高,九頭身比例,絕對符合catwalk模特兒的外在條件,她表示尚在適應中:「未入行之前,個個人都話好高,外在條件係適合,不過乜都要從頭學過,選港姐學嘅丁字腳、腰要挺得直,做model又係另一樣嘢。除咗甫士,仲要好有自信心,自己呢方面有待磨練,阿Kim(經理人)成日都笑我騰雞。」
empty
張舒雅選完港姐三年後慢慢領悟人生方向,嘗試向模界發展。
empty
張舒雅積極工作,一身便服挽着大小工作袋去髮廊。
「電視唔啱我」
作為模界新鮮人,CV中有着08年香港小姐冠軍之名會否加重枷鎖,她說:「自己做得模特兒有晒心理準備,做模特兒都係要拍片介紹自己,要成日去casting,好似見緊一份新工,仲要成日都要見,見得好密,人哋係知我係邊個,不過人哋揀你,係睇我家嘅表現。」
與張舒雅交談,感覺她個性爽朗,80後的她被冠上最hea港姐之名,她對此說:「80後都有積極一面,只係唔鍾意做出嚟畀人睇,比較會內涵啲,所以有時都唔係好公平。選港姐我都有積極、努力過,之前我未着過高踭鞋,每日綵排訓練到腳腫晒,只係電視唔係好適合我,我比較慢熱同靜,電視好健談,要多人互動。家模特兒世界啱我多啲,唔需要講咁多嘢,擺甫士行騷比較適合我,況且已經三年,人都成熟咗好多。」
empty
張舒雅於嬰孩年代,五官已十分標致。
empty
小時候的張舒雅(左)常以卡通人物服飾打扮。
會堅持到底
張舒雅謂模特兒工作需要高度的紀律,她說:「我每次開工casting一定會早到,喺香港做模特兒好乖,早睡早起,放工就返屋企,生活好簡單,平時所謂去玩,都係出街食餐飯。」
愛上模特兒工作的張舒雅,更表明有堅持的能力:「我鍾意嗰樣嘢會好堅持、投入,好似細個學鋼琴,四歲學到六年級,不過學跳芭蕾舞,學咗好耐好鍾意,但跳極都做唔到一字馬,老師覺得我冇天份,所以就半途而廢,到現在為止,我好喜歡模特兒工作,會好認真對待。」有否為其模特兒工作設下框框,她說:「唔會做內衣同泳衣job,但性感程度係可以接受,要睇番工作性質。」
empty
張舒雅小時與胞妹感情已經要好。
師姐好辛苦
張舒雅加入模特兒行業半年多,她十分欣賞媽咪級的琦琦,她說:「佢好健康、好勤力做嘢,又兼顧到家庭,係長時間都keep到咁好事業,處於一個好好狀態。」
談到師姐熊黛林及Angelababy均因身邊另一半提升不少知名度,張舒雅則抗辯:「佢哋好努力做嘢,見佢哋schedule好忙,做嘢好辛苦,知名度高係自己工作辛苦返嚟,Baby個人sweet,多人鍾意。」
empty
九頭身比例的她,絕對是行天橋模特兒的材料。
港姐要得體
新一屆香港小姐正舉行得如火如荼,作為過來人的張舒雅說:「唔好咁在意,大家眼中嘅香港小姐太有一個框框,大家停留咗,希望新一代香港小姐好似張曼玉、朱玲玲,要好大方得體,呢個年代冇啲咁嘅人,時代唔同咗。」
empty
張的化妝袋中,唇膏有近十支,可見她對妝容十分嚴謹。
empty
三年前,張舒雅選香港小姐摘冠,父母上台吻賀。
張舒雅Profile
英文名:Edelweiss
出生日期:1985年10月27日
身高:180cm
三圍:31、24、35
入行:2008年香港小姐冠軍
採訪:RitaLeung
攝影:MatthewLam
髮型:AlexSoofP.O.PHairdressing
服裝提供:MarcbyMarcJacobs