陳廸匡在1980年憑一首《傷心的小鸚鵡》紅遍香港樂壇，也是80年代組合Raidas主音陳德彰的哥哥。陳廸匡出過唱片，做過作曲、監製及電影配樂，也曾為王菲、張學友及台灣歌手邰正宵作曲及監製。日前他接受《蘋果》專訪，表示年輕人要有夢，當年為圓開錄音室的夢想，慳得就慳。
撰文︰祖李
攝影︰林德雄

逾60歲的陳廸匡，當年未出唱片前，曾在無綫做攝影師，之後在1978年連續兩屆參加無綫舉行的流行歌曲創作邀請賽，可惜兩次都得第二名，他說︰「第一屆我第二、陳百強第三，第二年嗰屆就輸畀露雲娜，又係攞第二。之後我間唔中上《歡樂今宵》唱歌，幕前幕後兼住做。」

死慳圓夢想

陳廸匡是家中大仔，二弟陳廸文及細佬陳德彰都熱愛音樂，陳廸匡說當年是受到表哥夾band影響才玩音樂︰「表哥好多樂器，跟佢玩吓玩吓就愛上。二細佬Peter就另外玩，德彰同黃耀光組成Radias，大家獨立發展。當初父母都唔贊成，覺得做音樂冇出色，後來明白咗，仲好支持我，畀錢我買結他。」他說在無綫做攝影師時，已經想開錄音室，為了理想，他放假就接騷，又做電影配音。直至1987年，終於開錄音室，他說︰「我一向都唔揮霍，好慳！睇準時間投資。當年我個錄音室，羅文、梅艷芳同鄧麗君都係熟客。幾年後再開全數碼化的錄音室，黎明、劉德華同張學友都好支持。最難忘係有次鄧麗君上嚟錄音，卻遇上困𨋢，嗰次真係嚇死我！」

幫學友作曲

陳廸匡1983年出唱片，名曲除《傷心的小鸚鵡》，還有《偷偷地》和《古剎銅鐘》等，之後他在電台兼職DJ，更入新藝寶唱片公司做高層，他說︰「20幾年前囉，嗰陣有王菲、張學友，佢哋隻《非常夏日》就係我作曲，如果王菲返北京錄音，我都要睇實。而台灣嘅范曉萱、邰正宵都係我管。」
80年代，陳廸匡於香港置業，卻換來慘痛經歷︰「我喺香港買咗層200幾萬嘅樓，當時20幾厘息，供咗12年，本金連息供咗成400萬，最後我用150萬賣咗，蝕到入肉。」香港樓貴，他惟有轉戰內地，2014年娶了內地女子，買樓收租，近日在內地搞音樂網站，又經常返港或到星馬等地工作，他說︰「06年我開始返內地發展，嗰陣想轉環境，覺得東莞環境、空氣好，食嘢又OK，之前係有少少亂，𠵱家就冇問題。」
場地提供︰Rock Angel Band House