被泰浴花描述重要部位
馮仁昭四圍超:張智霖「侮辱我男性尊嚴」
張智霖、曾志偉同林家棟𠵱家喺泰國拍緊電影《戰虎》,噚日有周刊大字標題話佢哋喺泰國去咗「凱撒大浴室」沖涼,呢啲色情場所喺泰國係好出名,一班浴花坐喺金魚缸入面,等客人挑選,被選中嘅浴花會入房服侍客人沖涼同提供另類服務。
袁詠儀陪伴左右
該周刊之後重訪問咗自稱負責服侍張智霖嘅浴花Nong,Nong話張智霖嘅重要部位又幼又長,好快就完事咁話。馮仁昭噚日打電話畀身在泰國嘅張智霖,佢話:「志偉係帶我去過呢啲地方見識,但我冇召妓喎!呢個浴花重咁講我嘅重要部位,真係有啲侮辱我嘅男性尊嚴,講到咁,即係睇我唔起。」
而佢女友袁詠儀原來都喺泰國,佢喺電話度大叫:「我對張智霖好信任,𠵱家我都喺泰國陪佢。」至於志偉就話:「嗰本雜誌之前打過嚟畀我,我已經叫佢哋唔好亂寫,成件事已經交咗畀律師處理。」唉!不過馮仁昭始終覺得藝人應該明白自己有頭有面,對自己嘅行為應該檢點啲。
王菲30套衫踩晒巴黎
王菲成為法國名牌Celine嘅「FriendoftheBrand」之後,月前佢為該品牌喺法國拍攝宣傳相,並喺兩日之內穿梭巴黎大小景點取景,拍攝當日天氣好凍,又落住微微細雨,令拍攝更加艱巨。王菲喺呢兩日內換上近三十套衫,重着勻春夏秋冬四季嘅服飾㖭,認真巴閉。
Twins邊拍邊照特別靚
Twins近日再做百老滙電器店嘅代言人,佢哋日前拍廣告時就連續拍咗二十個鐘,其中一個背景係由好多塊鏡搭成,Twins話一路擺甫士、一路可以多角度睇番自己,所以特別得心應手,電器店重送咗好多電器畀Twins,佢哋話今次真係過足手癮。
林百欣親證身體好
最近有報道話麗新集團主席林百欣身體狀況欠佳,噚晚重傳出佢病重,大批記者去到林伯位於九龍塘嘅豪宅門外,林太同長子林建名就好大方咁請晒啲記者入屋,安排林伯出嚟見人,着住睡褲嘅林伯比之前清減,但精神都算OK,佢同記者講:「我好好呀,冇事。」之後佢重同記者揮手道別㖭。
王賢誌細妹爬頭被催婚
今年九月王賢誌嘅二妹先啱啱嫁人,估唔到上星期六佢另一個妹妹王賢慧,亦同拍拖多年嘅男友拉埋天窗,喺尖沙嘴擺喜酒,當晚到賀嘅有利孝和夫人、白雪仙、姜大偉、周汶錡同周麗淇等,場面熱鬧。問王賢誌兩個妹妹都先後嫁人,幾時輪到佢娶老婆,王賢誌話:「兩次擺酒已經俾好多人問呢個問題,但一來自己唔急,二來我想放多啲時間喺工作先。」
雷兆光親自幫囡囡剪臍帶
九巴後人雷兆光噚日去醫院探日前分娩嘅太太雷林靜怡,佢話囡囡重六磅幾,英文名跟全家人「J」字頭叫「Jacqueline」,雷兆光說:「今次有拍video,我全程冇手震,重親自幫囡囡剪臍帶,生育真係好感動、好偉大,以後要更加愛錫老婆。」
張智霖俾周刊影到佢出入泰國金魚缸,但佢女友靚靚依然力撐佢。
資料圖片