市面上雖然未推出4K影碟,不過已有攝錄機同YouTube片支援4K超高清格式(4,096×2,160),除咗咁,仲可透過硬件升頻玩到4K。好似安橋最新嘅NR5010,內置第三代QDEO晶片,專責處理將1080p升頻成4K訊號,只需在Menu一按「4K Upscaling」,Blu-ray影碟立即由1,920×1,080,跳升為4,096×2,160輸出!雖然唔係真正超高清,但升頻後嘅效果,明顯比原生1080p細緻咗不少,情形就如藍光普及前,發燒友鑽研升頻DVD一樣,唔算好勁,但都叫進入咗4K境界囉。
亞洲高清協會主席李柏權認為,現時只有4K拍攝器材,但影碟、顯示器就完全跟唔上,令「4K Upscaling」變得意義不大;而影音天地Danny則表示,有4K片源都要有4K顯示器襯番,而且售價不菲,好似現場試播嘅SONY投影機VW1000ES咁,價位接近20萬元,絕對係富貴級玩意!