80萬上車真人騷|月薪3萬驗樓師康仔 26歲仔結婚上車的故事
結婚不一定要買樓,但如今結婚好像必要買樓。資深驗樓師詹濟南徒弟陳智康「康仔」像很多香港人一樣,結婚嘛,就買樓,26歲的他與拍拖10年的女友「瑪仔」在2020年10月10日步入教堂,寓意十全十美。他跟詹Sir搵食5年,和女友儲蓄80多萬元,目標是買入500萬元以下粉嶺私樓上車。疫情下,樓市下跌以為是常識,但結果卻不是常人所認識。由睇樓到擁有愛巢,這對新人經歷了一次心動與難忘的搵樓故事。
康仔是這樣入行做驗樓的:當年詹濟南招聘助手,他女兒知道教會朋友康仔在大學修讀建造工程,從此讓康仔踏上驗樓這條路。康仔2015年入行,實戰超過1,000個單位後出山,2017年開始獲詹Sir陸續安排出鏡拍攝驗樓節目,該年5月接受記者訪問談及月薪2至3萬元,康仔滿意地說:「收入唔錯!」
眨眼5年,康仔成家立室,今年10月10日與拍拖10年的女友「瑪仔」結婚。婚事收得好密實,詹Sir並不知情,直到今年3月驗樓期間才無意間被記者篤爆,情況是這樣的:「(康仔想買樓,你會唔會畀意見?)佢自己努力呢,畀意見?我唔識買樓㗎。(你知唔知佢結婚?)我唔過問佢呢啲嘢。(你會唔會經濟上支持佢?)仲唔支持?你諗吓以一個做幾年嘢嘅人,出面搵幾錢一個月,佢又搵幾錢一個月。我已經好多嘢支持咗佢。佢自己有本事佢可以買,唔好話來自我,佢自己都付出唔少。」
康仔和女友都是粉嶺人,讀粉嶺某中學邂逅,現在上車都想揀這區。多年儲蓄80多萬元,目標買入區內私樓兩房單位。今年3月初他和女友四出睇樓,經紀安排某日睇3個單位,第一個單位是粉嶺花都廣場低層戶,實用面積370方呎,入屋睇見主人房牆身甩皮,康仔直言:「嘩!漏晒水。」轉入細房就變問號人:「點解客房大過主人房嘅?」廚房是女人的地盤,瑪仔看見鋅盆竟然安裝在角落頭就呆咗,「咁洗碗好煩㗎喎!」單位業主開價510萬元,康仔話已超出預算,「心目中預460萬元至480萬元,480萬元都已經好盡。」唔啱價,牆身漏水又唔開胃,好快離場睇另一個單位。
接着睇7座高層單位,當時黃昏,康仔入屋說:「西斜!」但對比上述低層單位,康仔話:「呢間靚仔好多,同埋高層。呢間屋應該有執過吓,最弊地板同啲牆身要執過,但都企理過樓下嗰間。」單位叫價525萬元已超出預算。睇完兩個單位,沒有睇樓經驗的他都感到經紀賣樓手法是:「先睇一個差嘅,再睇一個好嘅,之後再睇一個啱你心水嘅。」
的確,經紀手法深入民心。之後步行幾分鐘到隔籬屋苑牽晴間,睇7座低層單位,實用面積393方呎,單位兩邊廳,一對準新人望住20多方呎的飯廳有無限想像,康仔想像改裝玻璃打機房,就算低層望園景都話「個景幾靚」,細房靠廳一幅牆原本磚牆換了木板都不介意,他們完全撻着,房間睇完一轉又一轉,康仔坦白說:「心動㗎,其實。」他解釋,牽晴間是讀書時經常來補習的地方,有很多甜蜜回憶。
心動不等於行動?單位業主叫價580萬元,遠超出預算,但聽到經紀話單位銀行估價520萬元,他們雙眼發光,康仔興奮地說:「如果520萬元嘅話……(瑪仔搶說:「好心動!」)去到呢個位都仲接受到。(記者問:超出預算喎?)唏,超支呢啲嘢,嘻嘻……牽晴間係唔同嘅。」瑪仔接着答:「情意結!」然而預算由460萬元增至520萬元,支付2成首期計算,首期將由92萬元升至105萬元,以2.5厘計,分30年還款,月供由14,540元增至16,437元。康仔稱:「由460萬元去到520萬元,雖然預算稍微調整,但呢度我會供得開心啲,呢度容易賣啲保值啲。」康仔口中的「調整」,其實是做「父幹族」,他到銀行做按揭預批,結果若要買入520萬元樓好「舋水」,和家人商量後,家人可提供50萬元資助,上車預算就由80萬元增加至130萬元,即時將門檻上調。不過該個令他們「心動」的牽晴間單位業主不接受520萬元這口價。
世事豈會盡如人意,數天後,3月11日世衛宣佈疫情定性為全球大流行,及後道指下跌2,352.6點或9.99%,創1987年「黑色星期一」後最大單日跌幅。令康仔心動的牽晴間終於落價,但之前睇單位已被另一買家以520萬元買入,經紀就介紹另一個樓層稍高的單位,叫價550萬元,康仔見勢鋤價,「想試500萬元!」大膽還價,結果業主不了。來回搓兩板,傾緊幾個不同單位,疫情對他驗樓收入影響不大,因為目前收樓都是早兩、三年前買入。興奮之情僅維持幾天,他無奈說:「屋企人有事!」不是吧?冇晒心機續說:「牽晴間應該拜拜!我哥間公司受美國影響嚴重,要睇美國救唔救得返,救唔返就執笠。」
他補充:「如果屋企人有失業,嗰嚿錢(50萬元)就攞嚟用,自己情願唔要呢嚿錢。(樓價跌,以你本身嘅錢,唔使佢幫,你都買我起吧?)有時話唔埋,我覺得我會幫返阿哥,點都係屋企人吖嘛……始終屋企人有咩事都要幫,同埋你無謂用到啲錢用到咁盡。」瑪仔接着說:「佢兩兄弟一齊養父母,如果哥哥出事,細佬就要補上,養返屋企人。」
除了屋企人,他們都擔心收入無以為繼。康仔坦言,詹Sir已半退休狀態,如果正式退休,估計收入減少兩至三成。但持有碩士學位唔驗樓都可以做其他工作吧?康仔回應:「有諗過,如果去做地盤,應該3萬元起跳。但我唔想毀咗詹Sir心血,你話要走,我一早走咗啦,點解唔出去,始終詹Sir擺好多期望喺我度,你見咁佢悉心栽培我,點解留返喺度就係咁解。知恩圖報,人哋畀咗機會你,你要報答返人,其實佢真係對我好好,畀好多機會我。」至於瑪仔收入微薄,月薪約1萬多元,上車供樓主要靠康仔。
及後疫情爆發第二波,二手減價成交陸續出現,多個屋苑跌至「4」字頭,例如粉嶺名都低層戶,實用454方呎,由528萬元減至475萬元成交;上水威尼斯花園高層戶,實用437方呎,由520萬元減至483萬元成交。有經紀推介居屋欣盛苑一個實用401方呎的兩房單位,已補地價叫價450萬元。康仔說:「單位450萬元,一毫子冇得減!」他委託負責其驗樓公司的律師協助,「律師話呢啲樓,手尾好麻煩,可能未必可以成交到,或者成交期超長。」銀碼吸引,符合預算,即使有手尾跟,都叫律師草擬臨約,瑪仔當時心想:「係你啦,450萬元,正呀!」由收到放盤到搵律師草擬合約,票都拎了,就短短幾小時,瑪仔說:「被人截糊!」經紀致電給他們該單位已被另一買家簽咗!
當時距離婚期約4個月,「我哋有時間表,6月前一定要買到,6月買唔到就租樓。」其實他們有能力上車,瑪仔說:「可以買,邊個唔想買?一路都想買。去到疫情,親人開始有經濟困難,慢慢我哋被動,唔積極睇樓,7月搵租盤。好多人講租樓幫人供樓,我唔想用呢個諗法。見步行步,時間去到邊,自己能力去到邊,咪點做。一路睇牽晴間租盤,月租1.2萬元,突然帝庭軒出現同價租盤,佢(康仔)打去問帝庭軒管理處,車位月租2,700元,就決定租呢度,因為牽晴車位最平都3,000幾元。配套上,呢度連住街市,打風落雨都唔驚買唔到餸。」因為康仔做驗樓,必須揸車四圍走,車位成為揀選租盤的要素之一。
由買變租,以1.2萬元租住帝庭軒一個實用419方呎兩房單位,「租咗樓後都無睇樓,而家起碼住一年先啦。可能臨完租約就完,經紀可以隨時搵我,我隨時喺隔籬,如果牽晴間叫價近500萬元都無問題。」瑪仔補充:「買到就買,唔會因為租咗樓,唔使儲錢。而家租樓,每月都儲到錢,等機會來了,或者同所有香港人一樣,抽吓居屋囉!」
-----------------------------
-----------------------------
-----------------------------
-----------------------------