搭的士兜路你同我都可能遇過，但搭巴士都會兜路，就真係少有。市民顏先生噚晚(23)喺沙田上咗部89X九巴諗住返觀塘，點知好衰唔衰懷疑個車長唔識路，巴士駛出大老山隧道之後就開始迷路，「左兜右兜」去咗九龍灣工業區，搞到差唔多成車人中途落車，再諗方法返屋企。顏先生鬧爆個車長訓練不足，形容九巴服務係「日日退步」喎！

顏先生話噚晚9點幾，佢喺沙田威爾斯親王醫院探完病，就喺第一城站搭89X返觀塘，諗住好快返到屋企。依照正常路線，巴士出咗大老山隧道，應該經彩虹出觀塘道，一直東行。點知部89X九巴，出咗大老山隧道之後，個車長好似唔識路，兜來兜去入咗九龍灣，去咗工業區嗰邊。

當時車上有成50幾個乘客，唔少人都鼓譟，鬧爆：「呢度究竟係邊鬼度？」顏先生話個車長全程無出聲，又無同乘客解釋或者道歉。「佢愈兜愈唔知去邊，最後乘客見勢色唔對，全車八成人都喺偉業街落晒車，自行再搭其他車返屋企。」顏先生話，周六晚工業區嗰邊人都唔多個，的士又唔見，佢行咗成廿分鐘先行到去牛頭角港鐵站，再搭的士返屋企。

顏先生經歷今次「奇遇」真係一肚氣，佢形容自己：「搭咗咁多年巴士，今次真係第一次，好令人懷疑個車長有冇足夠訓練，質疑佢究竟識唔識揸巴士！」佢仲同個車長表明，事後一定會投訴佢。

根據運輸署資料，因為大老山隧道的道路維修工程，由周六晚9時半至周日清晨6時，確實有改道措施，包括89X在內的14條巴士線要改道，改經觀塘繞道、太子道東、協調道、啟新道、七寶街、六合街、四美街及彩虹道，然後返回原有路線；但也不會駛去九龍灣偉業街。

九巴發言人話，因大老山隧道的道路維修工程，星期六晚89X線需暫時改道行駛，九巴已事先通知車長暫時改道路線，及安排督察於現場協助，有車長未能完全依足暫時改道路線駕駛，對乘客造成不便，九巴表示歉意，並會按機制調查事件。

你敢爆，我敢獎！ 即Call《蘋果》24小時爆相爆片熱線 ：63836568