昨日大市成交僅437億元,又是沉悶的一天。自從交易時間一再延長之後,港股橫行冇波幅的時間比以往更加漫長,尤其午飯後提早了的時段,至3時左右歐洲開市時,更加悶到瞓覺,小加「德政」,功德無量!另一大「德政」,是只顧上市公司數量而漠視質素,大量良莠不齊的新股令市場變得陷阱處處,小投資者根本全冇保障。李小加叫小投資者自己做Due Diligence喎,咪講笑啦,上市科都把關不力,散戶哪有額外資訊去查找上市公司的欺騙證據?港交所(388)最新醜聞,是容許中國高精密(591)以涉國家機密而毋須披露為由復牌,姑勿論當中是否涉及中聯辦介入,當香港這個金融中心連披露為本的基本原則都做唔到,國際投資者點敢再在這裡投資?睇睇A股極速敗亡、成交急降,便知監管不周對市場有多大影響,李小加仲想磨爛蓆到幾時?