當年今日
關於我們

「良心」亞視 靠洗腦組織遊行聲援

蘋果日報 2012/12/01 06:00

ATV亞視愛港之聲

城市電訊主席王維基日前入稟高院,控告亞視及執董盛品儒誹謗,日前盛品儒承認已收到信,但拒絕多談。

亞視高級副總裁葉家寶今日喺亞視總台參與「感動香港」拜神,佢都話件事已進入法律程序,所以唔方便回應,不過佢話聽日有班「愛港之聲」,會由大埔墟火車站行去亞視,作為聲援呢間「良心電視台」。其實呢個「愛港之聲」,就係撐國民教育嘅「民間組織」,曾經喺旺角搞「國民教育自由講論壇」,仲同反國教嘅市民起罵戰,有指佢哋每遇反對聲音就以粗口回敬,當日仲嚇親路過嘅學民思潮召集人黃之鋒。

葉家寶話,呢班「愛港之聲」嘅集會人士都係香港人:「佢哋係一班嚟自唔同階層、關注香港未來嘅人,佢哋感覺最近香港多咗風風浪浪,有啲正氣需要支持。」遊行人數方面,葉家寶表示唔清楚:「肯定唔止一個人,今次係佢哋發起咗,先通知我哋,我哋好開心,香港有好多正義力量,呢個係香港特別嘅地方,包容唔同嘅聲音。」

至於冇簽亞視、幫王維基拍劇嘅鮑起靜,佢認為黎明前夕總有黑暗時期,佢希望政府快啲有確定態度。陳啟泰亦望快啲平息件事,仲話認為亞視有進步空間添。