當年今日
關於我們

【九個主角.死剩四個】姊妹共侍黃日華?郭藹明周海媚關係混亂

蘋果日報 2017/07/07 00:20

黃日華張家輝蔡少芬郭藹明羅嘉良天地豪情

以前放工返屋企煲劇是常識吧?不過,家陣黃金時段啲劇,嗯,你懂的,質素冇保證,相反,半夜啲劇,深夜重播嗰啲呢,又唔同計法喇!喺播完一系列《妙手仁心》後,今晚重播另一經典劇《天地豪情》。
先睇卡士,主演嘅有黃日華、羅嘉良、陳錦鴻、張家輝、郭藹明、周海媚、宣萱同蔡少芬,當年都已經係「鐵膽」,佢哋有幾好戲,都詳述唔到咁多。既然咁耐冇播,先嚟個角色重溫,溫一溫啲骨幹人物同關係,睇起上嚟投入好多。不得不提的是,呢套劇九個主角,經歷62集人生起跌後,死剩四個。死咗嘅包括周海媚(車禍)、吳美珩(仰藥失救)、宣萱(遭張家輝毒手)、蔡少芬(遭張家輝毒手),同張家輝自己(意外身亡)。倖存嘅係黃日華(意外失明)、羅嘉良、郭藹明同陳錦鴻。
張家輝(演甘量宏/Kelvin)
係航空業鉅子甘樹培(秦沛飾)個細仔,後來發現自己身世非富家子,原來係被調包,佢阿媽係普通家庭顧玉媚(雪梨飾),為咗保住自己個少爺仔身份,開始不擇手段逼害甘樹培個親生仔程家雄(陳錦鴻飾),奸到出汁。
黃日華(演甘樹生)
義海集團主席,亦即甘樹培個細佬,曾經同程嘉慧(周海媚飾)拍過拖,仲「搞出人命」,不過程嘉慧唔想甘樹生因負責任而娶自己,所以就老吹自己已墮胎(最後有生到,個仔叫程立言);另一邊廂,甘樹生後尾追到程嘉鳴(郭藹明飾),仲娶埋佢做老婆。
羅嘉良(演卓尚文/Winson)
又名「大頭文」,同程嘉鳴原為冤家,後來墮入愛河,同程嘉鳴細佬程家雄係好朋友。大頭文同過為佢仆心仆命嘅Apple(姚瑩瑩飾)拍拖,但女方後來患癌,為免大頭文傷心,呃大頭文已嫁人,後來因血癌病逝,搞到大頭文傷心欲絕,仲同當時個女友嘉鳴分手,係個癡情種。後來大頭文同甘鳳欣(吳美珩飾)日久生情,但最後都係難捨嘉鳴。甘鳳欣以自殺作脅迫大頭文見面,不果,最後因服食過多安眠藥,失救而死。
郭藹明(演程嘉鳴)
同「大頭文」係一對冤家,更因對方而冇晒自己多年嚟嘅積蓄,亦間接令佢被未婚夫拋棄。後來先同過大頭文拍拖,結果卻嫁俾甘樹生,最峰迴路轉嘅係自己個姨甥係老公個仔,關係七國咁亂。
蔡少芬(演孫樺/Diana)
先後同過甘量宏及程家雄拍拖,到近大結局時埋甘量宏身,只為搵對方嘅犯罪證據,結果被殺及碎屍,下場勁慘。而家雄另一舊愛董若妍(宣萱飾)一樣有份幫手搵甘量宏嘅犯罪證據,但最後又係被買兇殺死。
翻查啲資料,《天地豪情》自1998年首播以嚟,先後喺2003同2010年重播過,而今次重播,又係隔咗7年,每個周期循環都係7年,係咪有啲咩玄機?