陳瀅今日同台灣女星張瑋純（純純）到九龍灣出席茶包開幕活動，純純着低胸裝輕露事業線。陳瀅獲委任為代言人，佢話：「好開心！我知道後唔係問有幾多錢，係問可唔可以任食？其實我同台灣食品好有緣，喺外國讀書時我去珍珠奶茶店做，因為好鍾意飲，所以人工好低都照做，學成之後仲喺中學開奶茶檔，同小食店阿姐爭飯碗，賺咗勁多錢。」

問到陳瀅鍾唔鍾意台灣男仔？佢話：「鍾意台灣嘢食多啲，我好似冇被台灣男仔追過，自己偏向香港同中國男仔，唔鍾意西人，一定要華人，我好孝順婆婆，外國人連送月餅都唔識，大家思想價值觀唔同。西方人一啲啲會開放，溝通唔一樣，我比較傳統。」

提到好友劉佩玥（Moon）日前被《蘋果》讀者透過「爆相爆片」公開佢同周志文撐枱腳嘅相，令兩人單緋聞再被炒熱（新聞連結： http://bit.ly/2eU3baL ），陳瀅就幫好友澄清，仲話阿Moon唔會收兵：「唔係，我哋同阿康、翟威廉一齊拍緊劇，不時都會約出嚟食飯，溝通多啲，等拍嘅時候唔使咁生硬，佢哋有隊籃球隊，我哋都會支持。嗰個係阿文定阿康？我都唔識分。」

另外，純純就話自從《不懂撒嬌的女人》後工作機會多咗，仲話自己好鍾意拍戲同電視劇，佢話：「自細就睇周星馳，希望有機會同星爺合作。」純純仲直認已經有個拍拖兩年嘅攝影師男友，問到結婚打算，純純就話要生B先考慮，但要等工作穩定先。