港股以過千億元大成交爆升，但係假如揸住一眾細價股，好可能會喺大升市輸錢。不過市場資金永遠都係走嚟走去，當大價嘢炒到咁上下，就會輪到中價股炒落後，然後又輪返到細價股。
正路股中以「六行三保」最多人追捧，但係呢類股再升多一浸，啲錢好快會食糊，再搵其他嘢炒，其中保險股相繼炒上，係時候部署炒隻無乜人吼嘅民安控股（1389）。民安與中保國際（966）為姊妹公司，有一定背景支持，雖然目前主要收入來自本港，但在出售盈保（065）以及積極開拓國內業務之下，預計未來保費和利潤主要將來自中國業務。
本月較早前富通保險國際全購盈保，民安因而得以高價悉售手持約10%盈保權益，總代價7.45億元，出售淨收益5.55億元，連同去年底上市集資約12.8億元，資金可說非常充裕。集團剛在本月初開設北京及山東分公司，並已獲中國保監會批准在上海、江蘇、浙江及河北開設分公司，新業務正步入高增長期。民安最近低位2.15元左右，現位買風險有限，向上空間卻可以甚可觀，見返上市高位仲有8毫子。

招中受惠招證上市

內地金融類股，招商中國基金（133）也是六行三保之外嘅另類選擇。此基金主要投資係招商銀行（3968），招銀股價升，招商中國直接受惠，另一方面，繼早前旗下興業銀行成功在國內上市之後，據昨日國內報載，招商證券已刊發接受上市輔導的公告，最快10月底正式IPO，成為首家國內IPO的證券商。以目前氣氛，證券資產估值必獲大幅提高，招中揸住嘅招商證券及興業證券，都會升值。