側田十二月喺紅館舉行兩場《JUSTIN CHAPTER FREE 演唱會2017》巡迴香港站演唱會，門票聽日公開發售，今日側田喺中環藝穗會宣傳， 並公佈加盟銀河世界娛樂有限公司。

側田經過兩年自由身，今次再盟唱片公司覺得好感恩，佢坦言：「自己係一個好多主見嘅人，有時真係要揀啱人去合作，今次公司畀好大自由度我，我依家成長咗，我只係喺團隊裏面一部份。」側田呢個巡唱喺香港站會特別加一part ，佢話：「第一part講入行，第二part講迷失，第三part講新開始，喺香港站會加一part講未來。」

大家都知側田有唔少負面新聞，講迷失呢part 絕對係最精彩，側田自己都話：「正呀，呢part我最鍾意，好dark又好down，好有感情，我一定會感觸喊，每次唱某幾首歌都盡量hold住，其實唔應該喊，因為我之後仲要勁歌熱舞。」講到呢part迷失會唔會分享往事？側田話：「我乜都會講，我唔會收埋，因為個騒觀眾都係我團隊一部分。」

嘉賓方面側田話我好想請玉置浩二，仲知道對方當日會來香港，側田話：「今次邀請嘉賓希望係part of show，會設計埋衫俾佢，唔係中間加入一部份綜藝性。 」門票明天公開發售，側田話自己對銷量從來唔會期望太高，因為受傷愈重，加場就唔會，因為楊千嬅緊接之後，希望有part2。