極有機會成為今屆立法會「新人王」嘅田二少，噚日喺美孚新邨開佢嘅首個地區辦事處。雖然對手「鼠王芬」有中聯辦幫佢抬轎，但田二少都唔輸蝕，有個強勁特區政府做後台，鬍鬚曾、張建宗、林D9、鄭汝樺以及林鄭月娥都喺星期日父親節畀面到齊，林鄭仲帶埋政治助理張文韜一齊出動，就知田二少幾咁有face，「鼠王芬」未必恨到。
來賓之中仲有個人幾吸引眼球，就係極有機會成為田二少競選對手嘅劉千石。阿石自稱噚日係以美孚新邨街坊身份到場，當然佢同田二少都相識多年，順道要捧吓老友場。「鼠王芬」雖然冇踩場，但就不讓田二少專美，揀同日下午喺深水埗街頭舉行個法律巡禮。佢嘅幕後軍師、港區人大代表高寶齡仲由九東走到九西幫佢打氣，可惜知名度同政府高官比仍然差幾皮，場面熱鬧程度同田二少嗰檔當然冇得揮。八方仲想提提「鼠王芬」，田二少係田北辰唔係田北「晨」，下次出新聞稿要留意吓喇。

交代婚外情做法明智

「鼠王芬」早前聲稱有民調顯示佢嘅支持度高過田二少，姑勿論呢個調查結果有幾堅，但似乎嚇唔到田二少。田二少好氣定神閒咁話，唔同民調有唔同結果，自己只會做好份內事，好似噚日晏晝就去南昌邨做一個綜援戶嘅家訪，體驗吓民間疾苦，同聽吓市民意見，佢認為呢樣嘢先係首要工作喎。
田二少屋企人都好支持佢參選，三女Lavina噚日都有嚟撐場，仲當眾咀咗老竇一啖，當係父親節禮物，搞到田二少好冧。原來田二少身上着住嗰件T恤，都係四個仔女畫嚟送畀佢；佢話四個仔女嘅英文名，都係L字頭，平時都會以L1、L2、L3同L4做代號。L有乜意思？查實係因為老婆姓梁，為咗尊重老婆大人，咪用L為名囉。
有市民覺得田二少日前喺電台節目坦承交代當年婚外情單嘢做法好明智，可以避免事件喺競選期間繼續發酵造成影響，但就覺得佢喺節目中點錯歌，事關佢點嗰首《最愛是誰》，係寫男主角發現身邊嘅女人未必係最愛嗰位，希望田太唔好因此而誤會田二少嘅憑歌寄意啦。

mailto:[email protected]