「行李門」事件擾攘兩年，隨着空勤人員一方勝訴而告一段落…就奇嘞，皆因主角之一嘅前特首梁振英似乎唔服輸，再三喺facebook追擊香港空勤人員總工會理事吳敏兒，繼之前話對方以政治立場凌駕常識之後，再話對方誤解判詞，貼文仲以「乘客的安全在吳敏兒這類人手上」為題，要求吳敏兒回答三大問題。

屢屢利用鍵盤力量發表偉論嘅CY，喺文中形容吳敏兒係「空中服務員兼激進工會頭面人物」，批評對方繼續喺法官判詞上誤導，佢先列出同翻譯部分判詞：「法院不可能判斷如果沒有這類 『酌情送遞』服務，對旅客不便的程度或影響」，話由此可見法官係「接納是有這類『酌情送遞』服務」。

CY第一問係「法院有說『酌情送遞』是只為吳敏兒口中的『權貴』服務嗎？有說我或我的家人向機管局或航空公司要求特權嗎？代表羅姓空姐的原訟人律師有在法院說只有『權貴』有這服務，一般乘客沒有嗎？有/沒有？」第二問CY就引述吳敏兒話「真正嘅常識係航空安全唔會因為任何類型嘅服務而妥協」，但CY覺得判詞明明講咗「行李交還給我女兒之前，已經通過爆炸品檢測及X光檢查」，反問遺失的手提行李通過檢査後，「航空安全有沒有被『妥協』？有/沒有？」

八方睇完頭兩條問題，都見唔到CY嘅質疑同保障乘客安全有咩關係，睇埋第三問，CY要吳敏兒答：「你至今營造的事實，是我行使行政長官的特權，或利用行政長官的職務，危害到當晚航班的航空安全，是/不是？」3個問題似乎係要一齊睇，原來CY係擔心外界以為佢利用特權危害到當晚航空安全，之但係法庭已經裁定空總勝訴、機管局違規，CY係咪使用特權？唔使吳敏兒答，公眾都有眼睇，好在CY聰明在冇直接鬧法官，咁就唔怕畀人「遺憾」啦。

立會補選新聞，《蘋果》一網睇晒
http://bit.ly/appledaily1125