周秀娜喺佐敦出席服裝活動,同幾個小model一齊扮櫥窗公仔,其中一個細路仲單腳半跪送咗支假花畀娜姐,佢收花時好開心話:「我好耐冇收花啦!」娜姐同陳偉成(Avis)甩拖都唔算好耐啫,唔通前度以前唔興送花?佢唔肯講有幾耐冇收花,只話:「我覺得男仔送花好浪漫,不過我更鍾意心意同驚喜,而兩個人喺埋一齊溝通同關心最重要,有冇禮物冇所謂。」
咁有新追求者未?娜姐嘆咗一口氣:「呢排有約朋友食吓飯,不過冇乜時間相處,我都唔心急。」但之前有雜誌狗仔影到話你拖有婦之夫嘅富二代喎?娜姐解釋:「0個個係內衣生意拍擋,亦只係普通朋友,佢老婆我都識。」但係又拖又攬人啵?娜姐:「普通朋友禮貌啫!」
「第八屆金話梅電影選舉」又嚟喇。今年除港產片有獎攞,仲增設「最爛合拍片」獎。栢芝憑四套電影入圍「最爛女主角」,應該冇得輸。大家快快投票啦,結果將於4月12日在《蘋果》娛樂版揭曉。
公投網址: http://facebook.com/AppleDailyGoldenPlum