成日話香港人最善忘，但絕對唔係個個係咁，長情嘅都大把人在。英國《每日鏡報》最近竟然有篇香港球迷嘅報道，一位當地喚作Hoi Po嘅香港人，兩年前竟然為愛隊樸茨茅夫裸辭隻身走到英倫，喺酒樓洗碗都要撐球隊，即使球隊近年只喺英甲同英乙呢啲低組別聯賽打滾，都無損佢嘅熱情。

話說Hoi Po係喺2007年英超亞洲挑戰盃時愛上樸茅，而佢個英文名亦叫Niko，就係因為當時隊內嘅克羅地亞中場卡蘭積卡（ Niko Kranjcar），就係叫呢個名。即使樸茅已由08年嘅英足盃冠軍，一度降班到英乙打滾，但Hoi Po都冇放棄球隊。

佢兩年前離開香港，申請working visa飛往6000里遠嘅英國居住，起初就喺餐廳洗碗維持生計，但呢份工必須每次都畀佢喺比賽日期間休息，咁佢就可以入場撐愛隊。不過，喺2016年5月樸茅作客普利茅夫場英乙升班附加賽四強，餐廳唔准佢當日放假：「我當時啱啱先有呢份工，但我決定要去睇呢場波，然後即刻就畀餐廳炒魷；當時我嚟到樸茨茅夫只有一個月，咁樣辭工係相當高風險，但我冇後悔......」

Hoi Po家陣喺一間合作社內工作，但佢個working visa就快到期，好快就要番香港，而呢兩年內只係錯過咗樸茅三場比賽，而佢就咁睇自己：「通常大部份香港球迷，如果間球會降班，佢哋可能就放棄撐隊波，但我覺得自己冇可能唔撐樸茅。」去年4月，球隊作客諾士郡贏波，取得英甲升班資格，佢仲坦言自己喺球場喊到收唔到聲。

-------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM