陳慧琳（Kelly）、林峯、琦琦同陳嘉容等今日到中環出席展覽，只見Kelly少有地著住平底鞋現身，問佢係咪又有咗？佢即刻大反應話：「吓！梗係唔係啦，肯定唔會啦！」言下之意是否已封肚？佢話：「咩都封，封晒成個人，唔止封個肚，平時湊仔打扮吓都唔得！」提到李玟日前表示正接受人工受孕，同屬過來人嘅Kelly就表示：「六年前嘅事唔係太記得，當時打針打到個肚花晒，唔記得支針係粗定幼，但都唔理得咁多，但求成功，當時咩都唔怕。」

近日演唱會門票俾黃牛黨大炒特炒，不少網民都希望當局用實名制買飛，Kelly就話：「有啲唔清楚，如果我買廿張請朋友睇咁點算？呢個方法聽落麻煩啲，如果到時冇人嚟坐咁點算？」又話以往自己演唱會係經歌迷會發售。

其實台灣好流行經歌迷會賣飛，因為佢哋真係好團結，如果每人限買四張，歌迷會就會自發掃飛，賣番俾歌迷會歌迷，以杜絕黃牛。但喺香港work唔work呢，就要視乎歌迷夠唔夠團結。

至於Kelly擔心實名制「到時冇人嚟坐咁點算」，咁如果冇把握，就唔好book咁大個場……睇番歷史，由2001年起，康文署轄下嘅紅館同伊利沙伯體育館皆容許主辦商最多扣起八成門票作「內部銷售」，理由係「平衡主辦機構在售票策略上的需要」，又話基於「自由市場的原則」，租場者／主辦商可自由選擇佢哋認為合適及靈活嘅渠道賣飛。呢個「絕望座位表」，真係「多得」17年前嘅康文署。

同場嘅林峯被問到點睇實名制，佢話：「雖然聽落好似防止到炒飛，但入場需要更多時間，似乎唔太方便，但我自己都諗唔到其他辦法。以往自己演唱會曾試過買咗飛俾親友，後來佢哋嚟唔到，於是當日試過叫工作人員喺門外幫我賣番出去，不過係原價。」

林峯表示近來忙於拍電影同網劇，咁忙咁咪無時間拍拖？佢話：「工作為主，感情嘢唔講太多啦，我一條心對工作。」係咪吸取咗教訓以後對感情唔會再高調？佢話：「我唔講呢啲啦，放過我啦。」對於前度吳千語話同林峯唔再係朋友，佢仍然唔肯回應：「我已經交代過一次，如果講工作上嘅嘢我無任歡迎。」