香港個股市炒到㷫烚烚，滙豐喺今年3到5月份時做咗個調查，結果顯示，07年香港股民多咗50萬人，呢個現象都係拜市旺所賜，可見炒股已經唔係有錢人嘅專利。
根據個調查，𠵱家全港約莫有186.1萬名投資者（所謂投資者，只要做2萬蚊港紙外幣存款都算係），比起06年多咗27%。其中87%受訪者曾經投資股票，大約162萬人，簡單嚟講即係大部份投資者都係股民。06年時，股民嘅比例只係77%，相當於113萬人左右；換言之，香港嘅股民喺1年內多咗50萬人。

多咗低收入一族入市

仲有，喺呢班「生力軍」當中，華華見到一個特別現象，就係越嚟越多年輕同較低收入人士參與投資活動，而且女性嘅比例越嚟越高。從滙豐個調查睇到，受訪者年齡介乎18至29歲嘅比例，由06年嘅12%上升至07年嘅17%，即係佔大約32萬人。年輕人大部份都係初出茅蘆，所以順理成章，佢哋亦都屬於較低收入一族，月入低於1萬蚊嘅投資者比例，由06年22%上升至07年嘅31%，佔成58萬人。
話時話，華華最近都聽講，啱啱畢業出嚟做嘢嘅年輕人，入市態度相當積極，唔知係咪初生之犢不畏虎，滙豐嘅調查仲見到，投資者傾向高風險、高回報嘅投資策略，24%嘅人將今年目標回報訂喺三成以上。
仲有就係，投資者出現「陰盛陽衰」：調查發現，女性投資者嘅比例高達56%，男性就由06年嘅48%進一步降至44%。
mailto:[email protected]