樂隊Dear Jane今日到商台宣傳新歌《寧願當初不相見》，佢哋透露主音Tim日前練歌時 突然整甩牙骹，Tim話：「我自己一個練歌唱唱吓，突然間聽到啪一聲，牙骹甩咗個嘴擘唔大。」佢透露可能係以前打波整親嘅舊患，導致有牙較鬆脫嘅情況。

成員透露早前嘅佛山演唱會，唱到中段Tim亦有出現呢個情況，好彩唔係好嚴重，但需要一直忍痛唱完成個騷。Tim話由於工作忙，一路都冇時間睇醫生，但情況愈見嚴重，所以都要盡快求醫，因為已經連食嘢牙骹都痛。

另外，獨立電子音樂歌手Merry Lamb Lamb，今日亦都到商台宣傳新歌《Night Ride》，佢話：「呢首係2018年嘅第一首新歌，歌曲主題係講一個孤獨嘅人，平時好收埋自己，直至有一日好想揸架車出去兜兜風，希望心情會好啲，但點知心情仲差咗。」

首歌係咪講緊自己㗎？Merry Lamb Lamb話：「其實都係嘅，自己係一個比較孤獨嘅人，我十四歲開始已經一個人去加拿大讀書，所以養成獨立同孤獨，因為需要一個人生活。」

嚟緊11月就會推出大碟嘅佢表示，新碟有十首歌，每首都係講自己唔同時期之下嘅孤獨狀態，過兩日仲要起程到上海，參加一個以電子音樂為主題嘅選秀節目，佢話覺得好興奮亦都好期待：「我當然想贏啦，因為我自己音樂風格都係電子為主，贏唔贏到都好，都係一個好好嘅經驗。」

精選娛聞，喺晒《娛果》
http://fb.com/appledailyent