台灣天團五月天喺樂壇打滾近19年，其他4位團員都已娶得嬌妻，只有42歲嘅主音阿信（陳信宏）感情一直成謎，多年來只傳過兩次緋聞，而其中一個就係助手「表妹」。(相關新聞﹕ http://bit.ly/2GyIv3D )

最近台灣《壹週刊》搵咗三位相士批算阿信嘅感情狀況，三位都話阿信「早已有對象」，其中江柏樂更斷言阿信「已秘婚7年、有小孩」，但小孩要到2020年先會曝光，而感情關係亦出現危險咁話。

阿信今日亦喺facebook開腔解謎，以《親愛的命理老師們》為題，寫咗212個字去回應。不過，阿信就冇直接否認或承認，只係話﹕「謝謝各位親愛的老師們，讓我了解每個平行時空裡的阿信們，都過著精彩的生活啊（笑）。最近確實感受到，生命是未知的旅行。終站抵達前，你以為此生大抵如此的平凡自傳，原來只是最動魄驚心之章前的醞釀。正因為命運的海洋如此變換莫測，人生航道上的小航海家們還是會依賴著你們的，各位命理老師請放心。有著一點點牽掛，有著一點點期待，有著一點點平和快樂的，這個時空的我，一切都好。」不過，阿信最後坦承生命確實有些波折，話：「甜美苦澀，點點滴滴，在我心頭，請不用擔心我。」

阿信日前被fans拷問感情狀況時，曾經霸氣表示「干你屁事」；但呢次明顯收歛咗，有fans講笑話係溫柔版「干你屁事」，亦有人覺得似係一首新歌咁有意境。

最港電影大獎投票網址
http://bit.ly/thekongestfilmawards

精選娛聞，喺晒《娛果》
http://fb.com/appledailyent