有線（1097）噚晚發公告，宣佈供股集資7.04億元，有線成功易主，啱啱入主有線嘅邱達昌表示裁員無可避免，會裁10%，而新聞之花張寶華今日出席活動，佢就話：「新老闆接手搞電視台，重整成本都好正常，因為要節省成本，10%比佢之前所講嘅cut三分之二，已經係大幅度減底咗，都可以理解嘅。不過依家傳媒好難做，個時勢又唔好，就算真係要cut人，都希望可以畀多啲優惠員工，即係可以畀肥雞餐佢哋，因為好多員工都做咗好耐。」

講到如果肥雞餐係三個月人工，算唔算肥？張寶華就話：「我唔知喎，但如果真係肥雞餐真係要優越啲，因為呢個係一次性嘅條件，加上唔只影響一個員工嘅事，係一個家庭嘅，希望佢哋可以考慮。」

至於有線會重視喺財經新聞，張寶華：「睇香港o依家嘅發展，做財經嘅新聞其實係一個最好嘅避風口，我以前都報道過財經新聞，都有一定收視，但有線做得最好嘅唔只財經，中國組都做得好好。新老闆強調自己係香港仔，會捍衛香港，都幾啱聽，希望佢講得出做得到。」