田雞田啟文近日接受《舊日的足跡》車淑梅訪問笑稱正在度條靚橋去同周星馳交手：「一定要好畀心機，想過度過，否則佢會嫌棄，佢連玩都要求好高。月中又係香港電影金像獎，我地年年都有叫星爺，但佢好忙，今年嗰段時間佢要開工，《美人魚2》要拍到六月，其實我一直在等佢叫我埋位，但仲未有訊息，不過一啲幕後人員已經通知我，應該有我份，我都希望參與其中。我哋緊密合作過13年，我當佢係知己，但我唔知有冇咁嘅福份，我當佢亦師亦友，我哋冇將友誼建立喺利益上面。」 

入行40年的田雞最難忘當年在酒樓賣點心遇上電台人李學斌，請求對方帶自己入行，對方一句說話使他茅塞頓開：「我帶你入行好易，但你點樣令自己留低？當時爸爸更潑冷水，文仔不能入娛樂圈，一，你冇咁嘅專業未學過，二，個樣唔掂又矮，三，你只有中三程度，四，屋企等你養……不過我實在太鍾意呢一行，呢一行唔係一份工，而係一個夢想，我終於留低到今日已經三十幾年，最近我更被推選為香港電影工作者總會會長，我一則歡喜一則憂，因為會好多時間，令到同太太相聚的時間減少。我對佢虧欠太多，希望遲啲搵時間去補救，雖然生活上並非一百分老公，但我個心向住呢個目標做，希望有生之年可以做到！」

精選娛聞，喺晒《娛果》
http://fb.com/appledailyent