大家對於電影《LaughingGor之變節》應該仍記憶猶新,警察卧底變節做咗古惑仔「隊」番老總;當戲咁睇的確幾過癮,但如果發生喺真實世界,唔知大家又有咩感覺呢?最近政壇刮起一場變節風暴,主角唔係LaughingGor,而係過去與泛民友好嘅社區組織協會主任華哥何喜華,佢呢排黐埋咗去民建聯度。
華哥變節有迹可尋,早前成為「梁粉」力撐CY。最近仲同出戰九龍西嘅民建聯副主席蔣麗芸站台,喺競選刊物粉墨登場,好肉麻話:「蔣小姐不時向我查詢低下階層的生活情況,積極關心弱勢社群,教人動容。」華哥講嘢好擦鞋喎,「查詢」一下都話動容,若果真係落手落腳做咪要以身相許?
八方好記得一件事,聲稱代表基層嘅蔣小姐,有次居然話要搽100度嘅防曬乳液,先敢落區。聽佢講呢句話,絕對教人「動容」。難怪「鹵味男」、人民力量錢偉洛喺臉書好勞氣話:「何喜華先生,你為甚麼會為蔣麗云站台,你知不知民建聯是一個甚麼組織,最少他在深水埗會驅趕露宿者,反對全民退休保障。」鹵味男又直斥華哥作為社區組織協會一份子,以服務社會上的基層和弱勢為主要對象,「今日你對得住他們嗎?」