蛋，全部都係蛋，今個復活節，肯定好多蛋，而且別具意義。始創中心今年特邀專長喺蛋殼內作畫、嚟自土耳其嘅藝術家Süreyya Noyan來港舉辦首個個人藝術展，名為「蛋殼中的彩繪藝術」創意展喺聽日至下月17日期間，展出80件精緻嘅蛋殼內彩繪藝術作品，將蛋殼以彩繪藝術賦予新生命。

除咗展出「經典名畫」同「土耳其建築」，呢次展覽更加包括咗特別全新創作嘅「香港地標和文化」及「復活節」等主題作品，等港人欣賞時更有共鳴。

Süreyya Noyan可算全球唯一喺蛋殼內作畫嘅藝術家，作畫過程好考功夫，先要小心破開蛋殼倒出蛋汁，繼而喺去除蛋殼膜後風乾，再以鉛筆、繪圖筆、水彩等顏料創作。由於蛋殼易碎兼空間小，加上有孤度，少啲耐力都唔得。