鄧紫棋（G.E.M.）入行以嚟，只承認同台灣歌手林宥嘉拍過5年拖，之後傳過搭上奀星馮允謙，佢都例牌否認。昨日有報道指佢同閨蜜何超蓮嘅弟弟何猷啟秘戀兩個月，二人上個禮拜同場現身北京慈善活動，猷啟事後將當晚活動嘅相圖片擺上微博，其中一張正係兩人合照。據知，二人當晚坐唔同枱，但未知是否刻意避忌而未有多談。

美國抽空見面

有指G.E.M.一早睇中甩拖數月嘅猷啟，更主動出擊，密密到三房大宅探超蓮，其實係想見多猷啟幾面，亦借意下廚煮甜品冧對方。報道又話G.E.M.爭取機會見猷啟，上月中出席完喺紐約嘅時裝周，都即刻去洛杉磯會合超蓮同猷啟。其實G.E.M.一早同猷啟相識，今年猷啟生日，G.E.M.忙極都有飛返香港為猷啟做籌委嘅香港政協青年聯會做表演嘉賓，兼慶祝生日，有冇親上加親就不得而知。對於被指媾掂猷啟呢個筍盤，G.E.M.噚日回覆本報：「假的，不太熟。」之後，佢亦喺Ig舉V似是而非咁回應緋聞：「心情這回事？非常莫名其妙。」
撰文：馮仁昭