當大家開開心心過完聖誕，又準備高高興興過新年嘅時候，千祈唔好忘記，大都市裏面，有一班好可憐好需要溫暖嘅人類朋友，家陣過緊好淒涼嘅生活。佢哋就係過百隻俾人遺棄街頭嘅狗，全部喺晒愛護動物協會嘅幾個中心度，等待愛心人領養。
愛協公關Rebecca話，唔知今個聖誕發生咩事，以往過聖誕總係有一批有心人領養被遺棄嘅狗，但係今年就只有廿幾隻貓搵到歸宿，被成功領養嘅狗只得三隻。若然冇人認領呢過百隻狗，愛協就冇空間收容新嘅狗，咁佢哋就要被送去漁護署，等待人道毀滅。
八方噚日上過愛協，見到隻膚色好似豬咁嘅唐狗Jollie，發覺佢好友善，原來係來自大嶼山一個地盤，係愛協進行地盤狗絕育計劃時攞佢返嚟嘅。Jollie一啲都唔抗拒陌生人，完全唔係一隻稱職嘅地盤狗，希望愛護動物嘅人士，好心收養咗佢啦。