咁又一年，聽晚又選新一屆港姐喇，今日呢班佳麗先嚟咗場熱身，着泳裝綵排見真章。

爭冠組
5號雷莊𠒇（Juliette）越戰越勇，唔只以34吋半上圍壓哨贏其他佳麗少少，仲贏埋運氣被抽中試戴后冠，可惜背脊多咗啲肉，行路有摺痕。至於原本係大熱嘅「好動李若彤」8號伍樂怡，笑容就有啲生硬，表現唔及之前自然。只得17歲嘅6號邱晴就成功減肥，同今日突然變靚嘅4號黃瑋琦一樣有機會爭到三甲。

差少少
10號張寶欣挾家姐張寶兒之名參選，以泳裝示人突顯到佢平胸身材，背後嘅胎痣仲好明顯。至於7號黃凱琪同9號金美黎就瘦過頭，側面睇以為係新iPad提早發佈咗。

矮過龍
10位港姐一字排開，好明顯分成兩批，唔係話佢哋分黨分派，而係有3位明顯凹咗落去……咁啱呢3位就係1號何依婷、2號李清心同3號梁家蔚，佢哋矮足其餘7位佳麗成個頭，企埋一齊影相氣勢輸咗一截。