去年憑韓片《德惠翁主》獲封「第53屆百想藝術大賞」影后嘅孫藝珍，將與韓國型男玄彬合作新片《協商》，新片已於上周六韓國坡州開機，預計明年上映。

片商JK FILM今日公開咗兩位主演劇本綵排及開拍後嘅花絮相，只見孫藝珍為新片剪去長髮，顯得更加爽朗，身穿警服相當型格。而玄彬就好似大隻咗，似乎特地為新片再努力操肌，勁有男人魅。

《協商》講述警察危機協商小組談判專家，在頂頭上司被綁架後，與犯罪分子對峙過程中發生嘅事。孫藝珍於片中飾演首爾地方警察廳危機協商3組談判專家夏彩允，玄彬就飾演綁架犯閔泰久，挑戰演員人生第一個反派角色。完成首次拍攝後，孫藝珍就大讚拍攝氣氛融洽，所以都拍得好開心，又指相信未來一眾台前幕後會更加有默契，而玄彬就指為今次角色花咗好多心機，希望展現新面貌畀劇迷。

另外，玄彬拍完《協商》後就要投入另一新片《猖獗》嘅拍攝工作，有指新片將與「國民初戀」秀智合作，秀智方面承認有收到相關劇本，不過最終因檔期衝突而辭演，電影方面亦指已開始接觸其他女演員。