新地賣樓不嬲幾有質素，商場亦搞得有聲有色。郭氏三兄弟嘅二佬郭炳江，噚日就跑勻港九兩地，講企業成功之道。
佢朝早九點喺香港管理專業協會，提到63年，老竇郭得勝、李兆基同馮景禧三兄弟創立新地時，已經好講團隊精神。即使73年分家，新地依然好着重互相扶持嘅文化，老竇亦肯放權畀下屬。
佢又爆話當年做暑期實習生時，某日置地突然打電話嚟，話想賣三項物業畀新地，老竇唔識英文，就搵佢同埋𠵱家係執行董事嘅陳鉅源負責，佢一邊同對方講數，陳鉅源就同郭父喺電話背後策劃，一單大刁就咁傾返嚟。雖然二佬話嗰時老竇只係畀基本交通食飯贊助，夜晚追女仔都要靠自己，但華華諗郭父其實想鍛煉吓二佬啫，真係用心良苦。

中午，郭二佬去浸會大學嘅世界商業倫理論壇講最低工資，佢話呢個構思實際唔work，佢亦唔支持，但指保障員工權益係每間有良心嘅企業赴湯蹈火都要做嘅事。至於新地每單建築工程，強積金會從合約費自動扣除，又攞埋每個工人嘅獨立戶口，判頭根本冇得走精面。佢又話，批合約呢種大事係一班人決定，冇人可以單獨話事，而工人對待遇有乜投訴，新地有專責小組跟進，內地夥計亦唔例外，絕對公平公正。
二佬舉例，早前四季酒店有啲「爛尾」，工人冇糧出，新地法律上冇責任，但都即刻包底，等工人返工有糧出，之後搵咗四季近200個管理層訂立問責制，冇人可以抵賴，所以工程最終趕及進度完成。
佢又話，𠵱家新地嘅執董大部份由紅褲仔做咗20年咁耐，好明白以人為本嘅重要，賣樓亦都一樣，佢話以前經常要突擊到樓盤問客戶需求，但試過有次俾住客當面訓話，原來佢同管理員有爭拗，仲話以後唔買新地樓，所以佢領悟到成功與失敗，人係主要因素，因為咁佢成立新地會，方便同住客溝通。
佢教精大家，話如果寄電郵畀新地嘅話，封信標題大大隻字有「投訴」或complaint，一定有人跟進，佢亦一定睇到封信，唔會有人隻手遮天。
有人問佢點管理好員工，二佬建議可以寫blog，佢啲仔女就搞得好成功，雖然佢唔識，但強調blog要寫啲可以為同事做到的事，最好達到目標，咁班同事就知道你係咪真心同有誠意促進雙方嘅關係。