唐詩詠，王浩信、陳瀅同李施嬅，今晚喺銅鑼灣出席化妝品活動，唐詩詠穿上吊帶裙，迫出一條深坑。早前詩詠拍劇暈倒，佢話已經冇乜事：「冇時間休息，拍完劇至調理身體，暫時用意知撐住，開工唔會病，一到休息就病，所以唔可以停。」王浩信即笑話有錢搵就精神，不過佢話近年忙於工作都忽略咗屋企人：「冇辦法，開劇比較忙，每日15至20鐘，家人都明白嘅，有時間會補償佢哋，希望暑假可以一家人去旅行。」

講到王浩信主演嘅新劇《踩過界》將會喺周六、日播，佢話係一個新嘗試。問到係咪為《蘭花劫》嘅低收視做救亡?王浩信竟然話信心不大：「因為我做盲俠，唔可以用隻眼去演戲，如果有25、6點收視已經好好。」

陳瀅着住低胸露膊衫，佢話件衫係大會提供，跟手佢就用大會提供嘅sticker黐住自己件衫嘅駁位，以防走光。講到佢老友何雁詩傳自殺，陳瀅即刻扯開話題：「我關心自己嘅事多啲，去咗佛山拍旅遊節目，早幾日返，晒足六日，搞到好多雀班，又甩皮。問到佢哋一班好姊妹係咪約定唔講何雁詩嘅事，陳瀅就話：「佢嘅私人事唔講太多。」係咪自殺?陳瀅強調：「冇咁嘅事，敏感嘅唔講。冇避開，只係好似構思出嚟咁，冇價值去講呢件事，亦冇實質嘅要講。」至於何雁詩嘅情緒點，阿瀅話對方一直都休息緊，放假心情，最緊要心情開朗。