【新增短片】
財政司司長陳茂波今日公佈用派發4,000元現金以補漏拾遺預算案中未有覆蓋的階層，當中以年輕人、大學生佔了為數不少的部分。就讀大二的梁小姐指政府於財政預算案沒有派錢，現時「唔派又派」，即是「本身有budget但唔做」，「其實我唔介意佢派唔派4,000，但如果有錢，可以做更多其他嘢，例如醫療，佢仲要cut budget，啲人睇唔到醫生，醫生護士又on call 36小時」。她認為政府可以把錢放作更有用的範圍，令更多人受惠，「好似我哋都係用嚟食呀玩呀，但最後咪又係要交稅，筆錢交返俾你，佢咪又係賺返，寧願佢放落醫療同房屋。

她認為今次派4,000的條件定得太闊，令不需要受惠的人也可以受惠，「 好似我呢啲大學生都會攞到錢，但係俾我哋，咪又係攞嚟玩，俾主婦亦都可能佢哋好有錢， 應該俾真係低收入嘅家庭或者人（打工仔）」，她認為政府由「吹風」2,000元或3,000元改到現時4,000元，做法不恰當，「講兩講又改， 一個政府唔應該係咁，當然多啲係好事， 但如果調轉嚟講，係咪講兩講又會少咗」。

就讀大一的李先生同樣獲得4,000元，但他第一句即說「 我覺得用咗喺冇需要嘅人身上」，「 至少我覺得自己唔需要呢4,000蚊，有更多人需要呢4,000蚊」， 他認為政府現時把資源放在不需要資源的人身上，他指今次派錢的條件定得太闊，「 我覺得好難有清晰界線，邊啲人可以拎，邊啲人唔可以拎， 但係好似主婦咁，佢嘅另一半可能好高收入，甚至高過家庭入息中位數， 我覺得唔應該拎到， 但呢啲人可能最後就係拎到」。

他指4,000元對大學生這類沒有需要的人而言，是沒有用的，「 對我呢啲冇需要人嚟講真係冇需要， 但對於有需要嘅人，例如住劏房嘅人嚟講，一年4,000蚊點會夠呀」，他指他獲得4,000後會部分用作儲蓄，部分捐出去， 而身邊同學大多打算用作去旅行及還學費。

政府今次「唔派又派」，他指「 政府唔應該因為輿論壓力或者政黨壓力，改變原本覺得啱嘅事， 會令政府無咁有威信，應該原先就好好計劃， 如果政府覺得自己做嘅嘢係啱，係唔會受到威迫」， 他認為政府由吹風2,000或3,000元，加碼至4,000元，「 高官淨係為咗想更加多人鍾意佢哋」， 他認為政府其實應該把今次整筆金額放在全民醫保或N無人士。

就讀大五（畢業年）的羅先生指，「4,000會攞嚟畢業旅行，去日本，身邊同學都是 final year，所以應該都係用嚟去旅行」， 他認為今次派錢條件範圍屬「大包圍」，令真正需要及不需要這筆錢的人皆能領錢，「 好似大學生咪即係賺錢買花戴」， 他認為這筆錢放在醫療開支更適合，例如增聘人手，他認為不少大學生皆有兼職，而且畢業後有一定工作能力，家庭負擔不高，應該無需獲得4,000元。 他認為政府派錢金額由吹風的2,000或3,000變成4,000， 定下金額的標準混亂，「 都唔知佢筆錢係點定出嚟」。

除現為大學生的市民以外，如90後等的年輕一代亦在新措施下更受惠。25歲的吳先生雖然贊成派錢，但覺得4,000元不夠，「都好過無，以前都派6,000啦，而家起碼都要1,0000先夠」，他認為，政府應該從政策層面入手，才能解決問題，「其實而家派錢都無咩用，但唔派仲慘，某個階層可能就乜都無，而家有少少囉」。

20歲的何小姐認為今次派錢的舉措合理，「無其他津貼既人都可以拎到，但如果呢4,000蚊用係其他範疇會更加好，而家唔夠全面囉。」何小姐批評，財政預算案不斷有變更：「改黎改去，會唔會之後突然又改？唔完善囉，仲可以再改善」。

「幾開心，第一次有錢派」，19歲的鍾小姐說，之前留意到財政預算案有很海洋公園的資助，對此她覺得不切實際，「唔係個個想去海洋公園，但如果佢比左一筆錢我，起碼都可以減輕一下補習費」，被問到會如何使用時，她說「都係儲起佢先」。

28歲的李先生批評是次派錢的舉動短視，沒有太大實質效果，「無咩用，如果呢筆錢用黎搞好醫療同埋其他未來既規劃，咁會好好多，而家只不過係一次性既舉動。」他又指，派錢的舉動令人感覺政府擺脫不了從前的一套理財哲學，「比人印象都仲係政府傾斜財團」。

《蘋果》沙士15周年系列網站，正式登場：
https://hk.feature.appledaily.com/sars15/