【新增YG回應】
韓國天團BIGBANG嘅四位成員都先後入伍，現時僅剩勝利仲未當兵。當中第一個當兵嘅T.O.P於去年2月入伍，不過去年6月佢被爆喺寓所吸食大麻，被判10個月有期徒刑，緩刑兩年執行及罰款12,000韓圜（約84港元），本身以義警身份當兵嘅T.O.P亦因大麻案而被革職，目前以公益兵身份服役。

不過BIGBANG於上周二公開新歌《花路》，當中網民就批評服緊役嘅T.O.P發表新歌涉及營利活動，質疑做軍人係唔係都可以賺錢展開活動。龍山區廳直認有人提出公益兵喺服役期間展開營利活動係唔係違規嘅質疑，兵務廳會喺本周商討後才能給予回覆。

《花路》係因為BIGBANG成員輪住入伍，所以發表歌曲答謝粉絲，當中除T.O.P外，G-DRAGON(GD)已於上月27號入伍，太陽及大成則分別於上周一及上周二入伍。由於《花路》發表後進佔各大音樂榜嘅冠軍，當中去年率先入伍嘅T.O.P有份作詞及獻唱歌曲，令人質疑T.O.P喺入伍時有份參與創作。不過T.O.P方面就解釋歌曲早於2015-2016年已經製作。

而龍山區兵務廳相關人士亦表示已向T.O.P及其YG事務所提交有關合約，需要確認有關音源嘅製作時間。據了解，公益兵喺服役期間唔可以做兼職，但可以參與公益活動。而入伍前簽約嘅演藝活動係冇問題，好似JYJ成員朴有天同金在中亦曾喺服役期間推出過個人專輯。

隨後YG表示，《花路》於兩年前錄製，T.O.P並冇違規。

更多韓流，喺晒《娛果》
http://fb.com/appledailyent