李八方online︱《星島》專欄捉林鄭監誓企錯位 「唯我獨尊」企正國徽中間
蘋果日報 2020/12/17 22:36
林鄭月娥星島公務員宣誓
咪話八方多心，近來建制陣營對特首林鄭月娥嘅抽掅，越來越多噃。好似噚日林鄭為副局政助監誓，夠晒政治正確啦，一樣被建制陣營嘅《星島》質疑佢「企錯位」。咁就啱啦，每件事都應該揸正嚟做嘅。
噚日林鄭為問責官員監誓嗰陣，企喺印有國旗區旗嘅背景板前正中間位置，面向成班問責官員，而班問責官個個都舉起右手面向林鄭宣誓，成個畫面同獨裁者檢閱有得揮。
今日《星島》專欄盧駿引述熟悉內地官方儀式嘅人話，林鄭監誓畫面，同總理李克強喺宣誓儀式為官員監誓畫面好唔同，因為李克強係企側面，宣誓嘅官員係面對國徽國旗宣誓，而唔係面對李克強，所以質疑林鄭企錯位，導致「令人有官員向她（林鄭）宣誓效忠的錯覺」。
林鄭昨為問責官員監誓，站在中間位置，而問責官員則向著林鄭宣誓。政府新聞處照片
早前總理李克強為官員監誓畫面時，站立在國徽側面，宣誓官員均面對國徽及國旗宣誓。中國政府網照片
八方懷疑呢個唔係「錯覺」，內地官員宣誓係向國家宣誓，問責官員宣誓正正就係要向林鄭宣誓啦，林鄭唯我獨尊，問責官正面向林鄭宣誓，以佢諗法，又做錯甚麼？睇返法官向特首宣誓，都係置中面對面；特首向中國國家主席宣誓都一樣。八方反而想知，聽日輪到常秘同部門首長宣誓，監誓安排會唔會因此有變呢？
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！