如果你係德國寶馬汽車嘅Fans,相信應該留意到廠方響較早前,曾於多個國際性車展上,展出一部走輕量化路線嘅M3CSL高性能跑車,佢比原裝M3來得更強勁嘅性能表現,可謂令人印象難忘。而喺寶馬最近公布嘅一份新聞稿中,指出廠方將會於今年6月至12月期間,響位於德國慕尼黑嘅生產線,以限量形式將之投產,而其中輸往英國嘅五百部配額,據聞已被車迷搶購一空,而且最快重可望於今年八月交車㖭!
其實,CSL絕對唔係解作香港某大電訊公司,而係Coupe、Sport及Lightweight咁解,而呢部M3CSL更係由寶馬嘅MDivision秘密研製,車重更較原有M3跑車輕出110kg,只有1385kg,再配合上一套3246cc直6引擎,所迸發出嘅360ps/7900rpm馬力(普通M3跑車為343匹),同埋37.8kgm/4900rpm扭力(普通M3跑車為37.2kgm)輔助下,難怪新車0-100公里僅為4.9秒,極速更可高達250km/h(有限制)咁快啦!但如果車主擁有賽車牌照的話,廠方更可為其將速度限制解除㖭!