林雪爆粗相信大家都聽過，但俾佢爆粗鬧到幾乎喊，唔知大家又有冇見過？

話說舊年簽咗畀黎明公司做歌手嘅形象指導馬天佑，日前應EVISUxDurex邀請，幫林雪同邵音音設計新形象，玩大變身。音音姐一見馬天佑白白淨淨已經嗒晒糖，摸佢塊面，又摸佢心口同大髀，之後仲打佢patpat，狂抽馬天佑水，馬天佑雖然好尷尬，但又唔好意思推開音音姐。

之後馬天佑幫兩位變身，但林雪一着件窄窄哋嘅流蘇外套上身就黑面「嘩」咗一聲，音音姐用「貓王就係咁着囉！」嚟打圓場，點知林雪就話：「貓王就係咁X樣死㗎！」林雪又彈件衫手臂位好窄好緊：「做X咗變型金剛添！」之後導演要求林雪同音音姐行catwalk轉身，林雪已經好唔耐煩問：「行乜X嘢？」，又話：「我哋行X咗先，然之後擺X完乜X，先X你老XX噏出嚟㗎嘛。」

林雪做訪問時被問到點睇自己個造型，佢毫不客氣咁勁踩：「我真係唔知個審美喺邊度。」之後佢企起身將件衫除咗一半：「老老實實，我唔知fashion係咪咁樣囉。」工作人員問佢係咪件衫窄咗少少？林雪索性除低件衫：「好X辛苦呀。」

其後，林雪同音音姐教馬天佑演技，佢哋示範完「咿泣」戲後，由馬天佑同音音姐試戲，期間音音姐叫馬天佑錫錫，但馬天佑似乎好尷尬、好抗拒咁狂避。音音姐問佢有冇錫過咁老嘅女人？馬天佑就尷尷尬尬咁話：「有，錫過媽媽！」之後音音姐多次想嘴馬天佑，但都唔成功，音音姐就忍唔住話：「煲湯都要老雞先好。」

馬天佑喪避勁NG，被阻收工嘅林雪扯晒火衝去大力拍落馬天佑後面塊佈景板度，好大聲話：「X你係咪拍㗎？X你老X！」跟住又指住馬天佑狂鬧：「有冇搞X錯啫，拍乜X嘢啫！」爆完粗未夠皮，林雪直情㷫到大腳踢落佈景度話「癡X線！」跟住佢推冧塊板，再指住馬天佑鬧：「點做戲㗎？拍一陣嘢咁X多嘢講。」

嗰一刻全場靜晒，而被鬧爆嘅馬天佑呆晒唔識反應，想喊咁款。工作人員安撫住林雪，但林雪就繼續鬧馬天佑：「我真係忍咗你好耐。」但原來成件事係有個幕後黑手喺度操控住……而呢段整蠱片會喺下月出街。