港足賽和國家隊，唔少政壇球迷都話，識睇一定睇埋「羅馬尼亞大戰菲律賓」嗰場精采賽事，皆因連一句撐港隊都唔敢講嘅特首梁振英，出訪菲律賓馬尼拉前，話可惜到時睇唔到球賽喎；點知同樣外訪嘅財政司司長曾俊華遠在羅馬尼亞，卻一樣睇到波，仲喺港中大戰和波後，立即喺facebook貼圖證明有捧場，大讚比賽激烈，鬍鬚曾呢個越洋正面抽射，殺個CY片甲不留。

議員褒曾貶梁

財爺嘅「撐港足」po，噚日已經有成三萬幾個likes，反之CY雖然喺和波後出網誌補鑊，讚揚兩隊全力以赴，但唔少網民鬧佢始終冇講明撐邊隊，CY呢鋪可謂由頭輸到落尾。
唔少立法會議員噚日都熱論呢場「外圍賽」，工聯會陳婉嫻笑言：「John Tsang好嘢，高水平，佢嘅舉動會令香港人覺得好舒服。」嫻姐話呀，港人支持港隊係啱嘅，唔明公開表態有乜問題。自由黨方剛直情鬧CY離譜，「香港人梗係支持香港隊，（同財爺比）直情冇得揮啦！」曹操都有知心友，有議員試圖幫CY兜，話兩個地方時間唔同，可能嗰個鐘數CY有嘢做。
有官場中人就大讚鬍鬚曾今次「好腳法」，早前有傳高官被封嘴，唔准開金口話撐邊隊，今次鬍鬚曾表態之時，只係講句「exciting match」，冇得俾人抽秤唔跟大隊！有網民提醒佢：「鬍鬚曾小心呀，方丈份人好小器㗎，因住佢嬲嬲豬呀……」

李八方
mailto:[email protected]