有人深水埗撒錢落街，引來哄動，有指發起人係幣少，各大報章頭條都係佢，宣傳分攞到盡，表面上，拎幾萬蚊出嚟有個咁嘅宣傳效果，好似真係幾抵，不過，事情過咗兩日，警察上門拉人，傳媒大起底，呢類成本相信幣少無乜諗清楚。

反而執錢嘅人，機會成本又有幾大？其實筆者就算見到條街有錢，大街大巷又好，小街小巷都好，都唔會執，法治意識係原因之一，但又解釋唔晒，因為即使唔會據為已有，亦都唔會執去警署，所以，倒不如直接講，大街大巷驚人多，小街小巷驚有閉路電視，唔單止係筆者，筆者身邊唔少朋友都係咁，驚嘅都係同一樣嘢。

還記得2014年，解款車灣仔跌錢，總共跌咗三箱錢，總值5200萬元，有1523萬畀人執咗，有約800萬搵得番，仲有600幾萬唔見咗。更重要嘅係，單嘢有三個人被定罪，一個緩刑，一個還柙14日之後判社會服務令，一個更加要被判監五個月。

要講機會成本，不得不提呢三個人究竟執咗幾多錢，緩刑嘅一位執咗8000元；還柙14日再社會服務嘅疑似執咗50萬（啲錢仲未搵返）；判監的一位執咗16萬元，全部係被告盜竊，即係全部都係要留案底。

返去今次撒錢事件，撒嘅係100蚊紙，仲要總數只係十萬，執到嘅相信好難會多得過解款車跌錢，加上唔少人玩直播，而執到錢嘅人又好難證明到，執嗰張就係撒嗰張，今時今日起底速度之快，如果真係為咗一千幾百搞到又要落口供又要上庭，機會成本就真係有啲高，都仲未計被利用已經成為宣傳戲嘅大配角呢部份。

散子

investMAN
For People of Style & Substance
掌握理財智慧 感受生活品味
http://facebook.com/investMAN.hk