拉布戰拖垮咗兩次立法會會議後，建制派終「成功爭取」今日起通宵開會。佢哋嘅如意算盤係人多蝦人少，博毓民、大嚿、長毛「冧檔」，咁就可以偷雞通過替補惡法。之不過，功能組別議員養尊處優多年，睇怕隨時早過佢哋瞓低。
假若再發生象哥假死事件點算？好在立法會秘書處保安人員都持有認可嘅急救資格，成個綜合大樓有八部簡稱AED嘅自動體外心臟去顫器。心臟病係香港第二號疾病殺手，毓民口沒遮攔，建制議員一個唔襟激，好易出事，到時用AED電一電即刻醒晒，開多幾晚通宵都得呀！
拉布戰咁緊張，毓民噚日都收到封自稱紅衞兵同中共地下黨員寄嚟嘅恐嚇信，話要殺死拉布的毓民同大嚿。但由於信中唔少字體都肉酸到睇唔到，都係得啖笑。