當年今日
關於我們

地產多聲道:恆基年宵賣匙包搵外快

蘋果日報 2003/01/27 00:00


恒基地產喺銅鑼灣維園投咗個年宵花市攤檔賣鎖匙包,點解搞到咁嘅田地?
據恒基地產營業部總經理張炳強講,喺維園擺檔,都係四叔(恒基主席李兆基)嘅意思。但點解作為第一個喺維園年宵花市擺檔嘅地產商唔係賣樓?
恒基地產投呢個檔口,其實目的都係宣傳旗下樓盤,派吓買樓優惠宣傳單張。但係食環署規定,每一個投到攤檔嘅人士,都一定要賣嘢,四叔就割愛將一批原本送畀業主嘅鎖匙包攞出嚟賣,每個定價一百六十八蚊。張炳強話,定呢個價喺貪佢好意頭「一路發」,至於準備咗幾多貨,佢淨係話大量!恒基繼開創農曆年賣樓先河後,𠵱家又率先利用年宵攤檔搞樓盤宣傳,認真夠創意。
噚日攤檔正式開幕,發展商舉行開張儀式外,重頒咗個一馬當先獎畀中原,賀佢哋做到最多宗數。而今次恒基用咗大約十萬蚊投得三個攤檔,加埋其他雜費,足足要三十萬元。話畀大家知,圖中兩位財神,都係恒基宣傳部同事扮㗎。

中原、美聯頻攞獎
發展商嘉獎代理嘅頒獎近期勁多,嘉華地產日前就頒銷售總冠軍畀中原,當然係因為中記做佢哋旗下五盤嘅成績最好啦!五個盤係馬鞍山嘉華星濤灣、九龍塘嘉皇臺、何文田嘉多利豪園、屯門嘉悅半島同汀九嘉御龍庭。中記透露,嘉華星濤灣做到超過百七宗成交,市場佔有率近五成。
不過,美聯物業都唔弱,獲得嘉里建設頒發「滌濤山2002年銷量冠軍最強地產代理」獎,嘉里物業執行董事朱葉培話,美記喺數量同總值都係
想攞「第一桶金」初三去碧堤
重有幾日就過農曆新年,喺呢個喜氣洋洋嘅日子,發展商會搞啲乜花臣呢?九龍倉就送第一桶金(圖三),果真夠晒應節。
發展商同蘭西講,到深井碧堤半島睇樓嘅人士,可以收到「第一桶金」,買家重有利是一封㖭,新年收到呢啲禮品,夠晒好意頭,利利是是。
外形似桶,裏面放滿金色包裝糖果,重貼有「第一桶金」四個大字嘅睇樓贈品,相信喺新年期間收到嘅人都會高興,點解?大人收到第一桶金,即係寓意發財啦!小朋友收到咁大桶糖果,亦會開心。
發展商已經準備咗超過千桶,送畀參觀樓盤嘅人士。不過,蘭西要提醒各位,若果想攞番個好意頭,記住碧堤半島初三先啟市,唔係去到摸門釘就唔吉利嘞。

龍成堡浴室有大玻璃窗
著名影星成龍有份發展嘅大埔龍成堡,上個禮拜發展商低調地開放畀經紀睇,等佢哋親身感受吓個環境,方便推介。
呢個起喺山丘上嘅低密度樓盤,地勢較高,環境寧靜,四周圍都係翠綠山巒,視野開揚。聽實地參觀示範單位嘅代理講,浴缸旁邊安裝一幅大玻璃窗(圖四),可一邊浸浴,一邊享受窗外大埔滘自然護理區景色,都咪話唔舒服。
加上山塘路一帶住宅唔多,隔鄰盈峯翠邸又自成一隅,私隱度高,狗仔隊要捕捉名星級人馬蹤影,睇怕有啲難度,如果個度再加強保安設施,享受全天候浸浴時就更有安全感啦!
阿爺買樓畀孫住
近年樓價係咁跌,重未見底㖭,但香港人嘅置業意欲都重係好強,其中有唔少個案係買畀親人居住。香港置業將軍澳新都城分行營業經理聶廷熹話,啱啱做咗單成交,係新都城二期十座高層E室,617方呎,以158萬元成交。買家係港島客,有成七十歲,幾個月前開始睇樓,最後揀到呢個單位,要嚟送畀個孫嘅。
蘭西
電郵地址:[email protected]
empty
銀包(圖)
empty
(圖三)
empty
(圖四)