新界東民主派補選候選人范國威一直被指「人緣差、無朋友」、同民主黨有「牙齒印」，但補選已令佢同泛民大和解。有白鴿黨中人透露，佢哋首次邀請咖喱范出席月底舉行嘅黨慶，原因係對方都喺補選伸出橄欖枝，白鴿黨都認為今次係破冰時機，咖喱范回覆八方話到時會出席！

當年由白鴿黨出走另組新同盟嘅咖喱范過去同白鴿黨關係可以用惡劣形容，但有白鴿中人透露，對方參與初選拜會民主黨中委，至最近年宵喺白鴿黨攤位拉票，可見雙方都有意改善關係，故此決定邀請佢出席月底舉行嘅黨慶，展現泛民大團結。

外界一直擔心白鴿黨未必盡力幫咖喱范拉票，八方就留意到，同咖喱范「牙齒印」最大嘅林卓廷日前都出動幫手，今次選舉可見民主派放低個人榮辱，好大決心4席全保。

【倒數4日】立會補選新聞，《蘋果》一網睇晒
http://bit.ly/2FPhzgY