國內突然宣佈收緊樓市貸款，設咗好多新限制，但股市冇乜反應，國內股市繼續炒上，新措施有冇影響要遲啲先知，不過，國內市場有咁多錢要入市，簡單一招半式嘅宏調措施好難將炒風遏住，當然，臨近國慶長假，市場交投靜，大戶要挾高個市唔難，所以，要睇實長假後國內股市會點走，應該會搵到啲啓示。
國內股市下禮拜放假，港股H股可以自己揸fit，如果大炒上去，即係話同A股嘅折讓會收窄，國內放完假A股有機會炒番上去，咁AH股炒折讓收窄個概念又會再發揮。

花旗嗰邊仲喺歷史高位之前徘徊，油價重拾升勢，美元係咁跌，人心虛怯，呢啲時間係最吸引嘅挾淡倉時候，因為好多人認為值博率高，兼可以食大茶飯，呢個世界邊有咁簡單，之前港股一路升一路引到好多人造淡，結果係點，大家都睇到。不過，港股可謂得天獨厚，花旗無情情減息，多咗個炒上藉口，祖國對特區嘅照顧亦令到港股前景冇得頂，總之，未出現真正大調整嘅訊號，港股都會係大漲小回嘅格局，跟住啲H股搵食冇乜錯，越大隻嘅股份越啱。
中海油C輪6095：中海油（883）報收13.06元，油價炒番上80美元樓上，中海油又生猛番，睇個勢下禮拜會升得快啲，先睇16元，可以買啲中海油C輪6095，昨收39.5仙，槓桿率3.3倍（有效2.6倍），對冲值0.77，正股升上16元，6095應該喺63仙樓上，正股11.80元支持力好強，不容有失，跌穿要止蝕。