【花生蘋台】華為危機大爆發 係因習帝連犯兩錯?
習近平花生蘋台孟晚舟華為危機
近日媒體開始熱傳,習帝喺G20阿根廷峯會上犯咗至少兩個策略性錯誤。
華為太子女在加國被捕事件,越來越撲朔迷離。除咗太子女嗰3本特區護照,究竟點得嚟之外,強國喺呢幾日突然好似「火山爆發」嘅表現,亦引起外界嘅興趣。有媒體開始熱傳,習帝喺G20阿根廷峯會上犯咗至少兩個策略性錯誤,令佢錯失咗化解今次事件嘅「黃金拯救時間」。嚟自強硬派同國內強烈嘅民族主義情緒反應,迫使佢要作出強硬回應。不過,咁做又會令中美貿易喺呢「90日停火協議」嘅談判節外生枝。有人仲問,習帝真係做好咗破釜沉舟,同美國人鍊過嘅準備?
綜合外媒嘅講法,習帝首先錯判形勢,當日得知華為太子女喺加國被捕後,為咗顧全大局,無喺同侵侵舉行談判時質問對方。結果要「硬食」,仲畀侵侵同佢班白宮群英有機會開脫之餘,依家多咗張牌可以打。海外華文媒體「博聞社」噚日引述中共消息指,習帝無同早知此事嘅加國靚仔總理杜魯多,喺G20峯會上有任何「互動」,係另一個「錯誤」。兩日後,加拿大卑詩省高級法院就孟晚舟案件發出「禁止報道令」,結果反令事件迅速曝光。
最可圈可點嘅係,靚仔總理事後高調承認,佢喺孟晚舟被捕前幾天已獲知有關拘捕行動,佢仲特別強調,無插手干預司法當局決定,亦無向其他國領袖披露事件。言下之意,即係佢無出賣盟友之餘,亦暗示咗係習帝無同佢傾呢件事咋。
侵侵真係唔知今次孟晚舟事件?若然係真,就反映中美博奕,唔係侵侵一個人話晒事。美國政府內部,特別係情報部門似乎熱衷於同中國打一場科技冷戰。《華爾街日報》噚日引述知情人士透露,美國聯邦檢察院或者最快喺今個星期刑事控告同強國政府有關嘅黑客,仲話呢啲黑客多年嚟入侵美國網絡技術服務供應商,破壞其客戶網絡及竊取機密。依家風頭火勢,仲傳出呢單嘢,背後點會無政治動機?係想趁勢向強國加壓,定係想破壞侵侵同習帝個刁,真係好值得深思!面對角逐連任壓力嘅侵侵,搞唔掂個刁,絕不會好過。
咁樣睇嚟,習帝又真係幾無辜,俾美國人玩咗一鑊。佢呢個時候應該好谷氣,明明講好咗停火90日,依家美國人借加拿大「放火」,仲想搵黑客問題嚟發炮,嚟緊仲唔知會爆出咩問題,唔通喺呢90日為咗個刁,鋪鋪都要「打落牙齒和血吞」(解作受了委屈不想事件惡化)?講番轉頭,美國人可能真係睇到呢樣嘢,乘機喺呢個時候有仇報仇,插多兩刀?怪唔得有消息指,中共內部強硬派抬頭,除咗搵加拿大嚟出氣外,仲決定要反擊美國。
不過,觀乎呢幾日強國官媒嘅反應,的確有啲「狗急跳牆」、亂無章法嘅感覺,甚至俾外媒覺得似乎已遭民族主義情緒「綁架上馬」,完全暴露晒華為同中共千絲萬縷嘅關係。中共越係反應激烈,就越俾人覺得背後有不可告人嘅秘密,之後其他國家肯定會用嚟做理由剔除使用華為設備。
無論如何,孟晚舟單case已進入加國司法程序,根本不容以政治手段去解決。若然雙方各退一步又如何?好似有美國華裔律師提議孟晚舟先認罪,主動到美國自首,最後罰款了事。呢個提議有啲天方夜譚,美國就係因為覺得罰款不足以對付違反對伊朗制裁令嘅人,所以先要捉佢哋去坐監,即係有法例要依,事情已經唔係反口覆舌嘅侵侵一句說了算。即使可以就有關控罪討價還價,都唔係短時間內可以搞掂。喺咁嘅形勢下,即使習帝同侵侵都想就貿易問題達成個刁,根本唔係件易事。中美最後爆大鑊,睇怕大家都可能阻止唔到,真係幾恐怖!