港交所（388）行政總裁周文耀呢個禮拜可謂歷盡天堂與地獄，都係多得特區政府。禮拜一，受港府增持港交所至5.88%刺激，港交所股價升到近兩張紅底，周文耀當初返港交所做行政總裁時，港交所醒咗批認股權證畀佢，行使價都唔使十蚊雞，嘩，今勻肥仔咯！
不過，做得「肥仔」就梗要交吓貨仔、做吓箭靶，DavidWebb、《華爾街日報》同本地傳媒，都懷疑港府入股背後嘅真正動機，所以噚日佢擔任香港會計師公會畢業禮嘉賓，一現身即刻俾傳媒追問。點知周文耀學咗門徒彼得三次唔認主嗰招，三次行過都唔睬記者。

學彼得三次唔認主

知道周文耀會蒲頭，華華同成班行家都蜂擁而至，一見佢到場即刻圍住問：政府入股港交所係咪會干擾巿場？會唔會影響港交所獨立自主？增持港交所係咪因為要同內地交易所換股？有冇時間表？呢排股價急升，你會唔會行使手上嘅認股權？
點知周文耀一律回應話：「我唔知。」又話同內地交易所互換股權呢啲問題，應該問港府，跟住就避入會場。
不過，唔知係公會無心之失，定有心整蠱。話說周交耀諗住鬆人入會場，點知大會話個場未入得，護送番周生去嘉賓休息室。華華話得整蠱梗有啲嘢，個嘉賓休息室入面有記者在場，咁咪即係「送羊入虎口」？所以公會又護送周生退返會場……就係咁，周生由呢間房轉去嗰間房，前後三次俾記者追。
不過，出得嚟「行」梗有啲本領，三次畀記者追，周生都只係話「唔知」同一笑置之，搞到俾華華行家笑佢係彼得三次唔認主。有記者仲講笑話，作為行政總裁嘅周文耀竟然「唔知」係咪可以維護港交所嘅自主權？
[email protected]

Paul周認股權值6億

華華最鍾意同富豪計身家，冇得使都可以等大家一齊恨吓。家吓最令大家恨得牙癢癢嘅，應該係周文耀。
Paul周03年入去接神童鄺其志棒，做港交所行政總裁嗰陣，港交所醒咗批認股權證畀佢，行使價係8.28蚊，可以換到328萬股，冇錯，係8.28蚊！唔使「O」型嘴，用噚日收市價184.7計，每股賺176.42蚊。
家吓可以計數，如果全部行使晒批options，成本係2715.84萬銀；用噚日收市價計，值成6.06億。不過，港交所長升長有，Paul周又唔見得好等錢使，到家吓佢都係行使咗164萬股，使咗1357.92萬銀。