劉偉強導演，古天樂、方中信及盧海鵬等主演嘅電影《武林怪獸》，噚晚喺圓方舉行首映禮，楊千嬅同老公丁子高、鮑起靜同老公方平都有去捧場。大家繼續關注古仔下月1號係咪會去商台叱咤頒獎禮，古仔話：「唔知，拍緊戲，天雨關係，唔知拍到幾時，除咗冬至之外，其他日子都要開工，本身嗰日(1號)冇假期。」

原來噚晚古仔出席完首映之後，都要繼續為新戲開工，而且係一場槍戰同飛車戲。講到古仔之前整親腳，拍飛車會唔會有危險？佢就話動作戲都係架車，自己唔使點走，之前拍戲唔多唔少都會有意外，醫生亦叮囑過唔好做任何運動，動作戲都有搵替身，不過意外就係意外。

另外，方中信喺《武》片中做太監，仲同個女人爭奪古天樂，不過就冇親熱戲，佢笑住話：「有就勁啦！但我都唔會拍，幾十歲人唔會搞呢啲，部戲我要帶個女去睇，點得呢？」

方中信又話下月會再同周潤發合作拍新戲，已經係第二次合作，今次較多對手，最近大家成日一齊跑山，所以默契越嚟越好。而佢呢排亦沉迷跑山：「唔跑唔安樂，0依家好似阿叔咁，朝朝五點幾起身跑一個鐘，同晨運客變熟，見到都會主動打招呼，不過年輕人就唔太主動打招呼。」

精選娛聞，喺晒《娛果》
http://fb.com/appledailyent