「五窮月」殺到，今日個市仍未打破悶局，戰友完全無心戀戰，去彭博部機㩒下，值得Click入去望下嘅新聞寥寥可數。好在，踏入5月，各大上市公司都排隊開AGM（股東周年大會），依家唯有希望高層講多啲嘢，俾個方向去炒都下都好。

查實每年AGM，都有唔少小股東都準備定「吉胃」，去酒店拆番餐勁（有人仲要拎袋準備打包）。食都事小，最最最重要係，小股東等咗咁耐，終於可以「爆」啦！將咁耐以來有咩不滿，兜口兜面同大股東攤牌。好似今日咁，長實（001）旗下的匯賢（87001）開AGM，主席甘慶林就俾小股東輪流「質」；仲有上次電能實業（006），霍建寧都被股東鬧狗血淋頭。

至於全城都熱切期待嘅長和系AGM，即將於下星期五舉行。作為傳媒中人，大家最想知當然係超人見唔見傳媒（上年5月的股東會及8月的中期業績會，超人罕有不設記者會，打破歷年慣例，真係嚇窒傳媒界呢）。OK！有答案！和黃（013）發言人證實，超人今年AGM後繼續唔．見．傳．媒！

原因方面，今次發言人就醒咗，強調超人身體健康，封後門等大家唔好亂估。仲話之前先唔夠1個見咗3次，所以AGM唔使見啦。

如果大家仲記得嘅，超人2月28日業績會後已見過傳媒，第二日再見多次，就外媒低估身家作澄清（嗱~呢次係冇通知蘋果記者去），然後3月21日向淡馬錫賣25%屈臣氏，再見多一次。

不過每次超人出來都金句一鑼鑼，睇樓市、投資又咁準，連科網都玩得咁叻，相信唔少戰友真係想見超人見多幾面，當係指點迷津都好呀。