萬人迷基斯坦奴朗拿度又有「新玩具」！呢位葡萄牙球星幫國家踢完世盃外圍賽後，已經返回馬德里，即喺網上晒佢架紫紅色法拉利F12trs新跑車。

C朗呢架新車價值35萬鎊（約350萬港元），但對於周薪達36.5萬鎊嘅佢嚟講，真係一星期已經夠錢畀。據講最高時速可達340公里，由0至100公里只需要2.9秒，十分高速。C朗將新車相放上ig，囝囝小C朗仲坐咗上司機位同爸爸一齊影相。

C朗係愛車之人，以往收集好多名車，林寶堅尼、保時捷、勞斯萊斯同奧迪乜都有。至於佢最近喺世盃外圍賽威爆，主場5:0大勝法羅群島場波連中三元，其中一球仲要係半車身倒掛，妙到毫癲，之後作客小勝匈牙利1:0，隊友安達施華一箭定江山嗰球，又係佢助攻。不過，返到皇馬後，佢就要繼續喺西甲坐波監，直至今月20日對貝迪斯先可以復出，但喺歐聯戰線就可以上陣，會喺下周中分組賽首仗主場對尼科西亞，重披皇馬戰衣。