巫斯義本月5日初六已開始停賽，要到本月26日谷草夜賽先可以復出，期間損失都可以話好襟計。遠嘅唔講，就講本周三晚賽事，兩匹上次由阿巫贏馬嘅「鴻福滿滿」同「高山威龍」，預料分別會換上韋達及莫雷拉上陣，「鴻福滿滿」贏完田草1600轉谷草1650米，過去谷草1650米三戰兩度上名合發揮。而「高山威龍」換上當紅炸子雞莫雷拉，續跑贏馬路程谷草1000米，加埋胡森要爭成績，呢場頭馬分分鐘俾莫雷拉攞走。