當年今日
關於我們

黑男人白女人 - 左丁山

蘋果日報 2009/12/17 00:00


意大利總理布魯斯科尼俾抗議人士(疑是神經漢)用硬物擲中,弄得滿面鮮血,鼻折牙甩。堂堂一國總理,搞成咁狼狽,佢啲保鑣難辭其咎。因而想起,十二月十日學生衝上中大禮台示威之時,如果要擲蕉,唐司長及曾特首咪好容易中招?想落牙煙,好彩香港人唔會似歐洲人咁狂野啫。以美國保護總統嘅安全標準,奧巴馬一定唔會被人羣包圍,由此觀之,歐洲係比較自由啲嘅。
思想方面,亦係歐洲自由啲,試睇吓,老虎活士大玩一夜情,妓女情,因太太砌佢,弄出小車禍而完全曝光,卒之話要無限期退出高爾夫球比賽,廣告贊助商走頭。私人嚟講,收入損失慘重,對高爾夫球壇嚟講,亦係慘情,冇咗活士,啲高球賽事電視收視率實跌啦,現場觀眾亦會少咗,直情係另外一場金融海嘯。
意大利法國就唔同呢,布魯斯科尼愛拈花野草,情婦無數,開會時公然靚女,對性事有興趣過公事,但係佢嘅私生活完全冇影響佢嘅民望噃,一於總理我自為之。法國總統薩爾夫齊以前夫妻同搞婚外情,現任太太不知有過幾多情人,但法國人亦唔理。反之,老虎活士就大件事咯。
一位黑人評論員在電視台話活士惹人反感之一個原因,係女性黑人好唔高興佢。美國黑人大有成就者(奧巴馬例外),好鍾意娶白女人,情婦亦係白女人,令黑女人感到不是味兒,妒火中燒。經呢位男黑人評論員一講,咦,係噃,到目前為止,報紙上所見嘅活士「情婦」,全部係白女人,冇一個黑婦,唔怪得呢位評論員話,黑人唔鍾意活士,白女人同情活士太太(瑞典白女人),白男人就眼紅黑色活士咁風流玩白女人。唉吔吔,呢味嘢原來同膚色咁有關係,唔怪得活士事業不死,不足以謝天下(美國)。一位日本男士係活士球迷,對此大惑不解,對左丁山講:「呢啲事好平常啫,我地睇活士係睇佢打波,唔係睇佢有幾多個一夜情人!」左丁山突然醒起,東京六本木有好多黑人企街,問佢為何如此?日本朋友話:「絕大部份係尼日利亞人,到東京名為讀書,實則兼職,做保鑣、派傳單、媾日本女,我哋冇眼睇!」佢話不少日本女士對黑人情有獨鍾,會自動勾搭,自願獻身,令佢哋日本男人好激氣喎。