台灣男星王陽明（係真‧王陽明，唔係娶阿嬌鍾欣潼嗰個「醫界王陽明」）一向都係保育支持者，尤其係對海洋生物，早前喺台灣為咗一單澎湖漁民意外捕獲國際瀕危物種「鬼蝠魟」，因傳出船長要拍賣，有網友私信王陽明求救，王陽明肉緊搵人幫手，但最後變成「羅生門」事件，而王陽明亦因此成為話題人物。

王陽明今日喺台灣出席化妝品品牌舉行嘅世界海洋日活動，現身擔任世界海洋日公益大使。佢提到同太太蔡詩芸在2014年底左右開始喺菲律賓投身保育海龜，令當初只錄得幾百隻海龜生蛋，到如今增至一年救到4,000隻，佢哋兩公婆仲計劃喺當地幫海龜興建小泳池，令保育環境更完善。但遭當地政府質疑需科學家或海洋學家身分，先至可以執行，所以王陽明話o依家同老婆諗緊，係咪要去進修相關學位，並取得資格，不過，咁樣搞一搞，王陽明兩公婆一定要將演藝事業暫停，所以o依家係一個兩難嘅局面。

王陽明話，雖然未有任何決定，但係佢同太太已着手計劃成立基金會，主要針對海洋或整個地球，或是特定動物，詳情同細節仍係商討中，而佢本人將會喺今個月中去上海開工，之後會去墨西哥拍攝大白鯊紀錄片，王陽明話希望可以唔使再喺籠中同大白鯊接觸，而係親身接觸。

精選娛聞，喺晒《娛果》
http://fb.com/appledailyent