【新增動新聞】
車路士領隊干地和曼聯主帥摩連奴早前經歷四輪舌戰，由「小丑」到「老人癡呆」，演變成「打假波」和「小人、偽善」，可能唔少球迷都食住花生等緊摩佬喺Round 5出招。不過，呢位葡萄牙主帥仲未出手，就有一位前輩級教頭出嚟鬧爆兩個「後生仔」，仲一錘定音話：「兩個都癲癲哋㗎！」

咁夠薑出聲嘅，係家陣量緊地無嘢撈嘅前英格蘭代表隊領隊卡比路，呢位意大利教頭係咁講嘅：「我諗干地唔係好知自己同緊邊個嘈交，係車路士呢樣嘢辣著咗摩佬，記唔記得干地做車制領隊果陣，摩連奴有幾唔開心，因為呢份係佢以前嘅工吖嘛！大家都記得摩佬以前係點慶祝㗎，我就覺得佢兩個都癲癲哋㗎，我發夢都無諗過呢單嘢可以發展到Round 4。你要記住，你辣著咗摩佬，佢嘈交果陣係好醒目嘅，可能佢只不過係想將外界嘅焦點扯走，唔好集中喺曼聯身上。」

卡比路又話自己肯定唔會同摩佬玩呢啲遊戲：「首先你嘅英文一定要好好，我一向都好想要一個信得過嘅傳譯員，因為你用英文講嘅嘢有可能俾人譯錯，但總之同摩佬嘈交就係好危險㗎喇！」

--------------------
BFB CHAMPIONS 2.0 新年活動大放送！每日免費11連抽！立即加入 http://bit.ly/2xrTKGM